Binyuze mu mikino, ku bufatanye n’Ishami ry’Umuryango w’Abibumbye ryita ku baturage (UNFPA), Akarere ka Nyamasheke gafite gahunda yo kwigisha urubyiruko ku buzima bw’imyororokere, kurwanya inda zitateguwe, kwitabira gahunda zo gupimisha inda mu gihe batwite, kurwanya SIDA, guhangana n’ihohoterwa rishingiye ku gitsina, n’ibindi bigamije imibereho myiza yarwo.

Ibi ni ibyavugiwe mu nama yahuje Umuyobozi w’ubuzima mu Karere, abahagarariye ibigo nderabuzima, abagize komite zicunga ibigo nderabuzima n’ibitaro byo mu Karere ka Nyamasheke, ndetse n’umuhuzabikorwa w’Inama y’Igihugu y’urubyiruko ku rwego rw’Akarere.

Umuyobozi w’ubuzima mu Karere ka Nyamasheke Bankundiye Etienne, yabwiye abitabiriye inama ko ibi biganiro bizajya bitangwa binyuze mu mikino itandukanye izajya ihuza urubyiruko muri buri mpera z’icyumweru, ikabera ahantu hamwe muri buri murenge, maze ibigo nderabuzima bikaboneraho gutanga ubutumwa bugamije guhindura imyumvire y’urubyiruko ku buzima bw’imyororokere.

Uretse gutanga ubutumwa butandukanye muri iyi mikino, urubyiruko ruzajya rwigishwa runashishikarizwe kwipimisha virusi itera SIDA ku bushake, urubyemeye ruhite rupimirwa aho ku kibuga, nk’uko Bankundiye yakomeje abivuga.

UNFPA iteganya no kuzakoresha amarushanwa y’imikino itandukanye irimo umupira w’amaguru, basketball na volleyball, amakipe atatu ya mbere azitwara neza azahabwa ibihembo.

Tuyishime Jean de Dieu, umuhuzabikorwa w’Inama y’Igihugu y’urubyiruko mu Karere ka Nyamasheke, yavuze ko iyi gahunda ari ingirakamaro kuko izagira uruhare mu gutanga ubumenyi buzagirira akamaro urubyiruko bigaragara ko ruri kwishora mu buraya cyane, ikaba n’igisubizo cyo kutagira aho ruhurira ngo rwidagadure rwahuraga nacyo.

Iyi gahunda izajya ihuza urubyiruko rwiga ndetse n’urutiga ruganirizwe, ndetse runungurane ibitekerezo nyuma yo kwidagadura.

Nyiranzeyimana Espérance Ushinzwe Itangazamakuru mu Karere ka Nyamasheke