Turatsinze Samson wagize uruhare muri Jenoside yakorewe Abatutsi wireze akemera icyaha, avugwa gukoresha impapuro mpimbano akigabiza imitungo y’umuryango yishe muri Jenoside yakorewe Abatutsi.

Niwemwana Leatitia warokotse muri uwo muryango Turatsinze yishe muri Jenoside utuye mu Mudugudu wa Kitarimwa, Akagari ka Rukoko, Umurenge wa Rubavu, mu Ntara y’Iburengerazuba, yatangarije ikinyamakuru Izuba Rirashe ko yatanze ikirego ku wa 23 Nzeli 2010, atsinda inshuro zigera kuri enye aburana ikibanza n’inzu byabo byatwawe ku mahehere.

Nyamara nk’uko izo nyandiko zikomeza zibigaragaza, ubwo Abatutsi bibasirwaga muri ako Karere mu mwaka wa 1992, Turatsinze nawe yahise yibasira isambu ya Niwemwana ubu utagira abavandimwe n’ababyeyi.

Nyamara nk’uko biri mu mwanzuro w’urubanza rw’Urukiko Rwisumbuye rwa Rubavu, bigitangira Diyoseze ya Nyundo yahakanaga ko Turatsinze bataguze, ariko kera kabaye yemera ko baguze.

Bikomeza kugaragara kuri kopi y’urukiko rwemeje ko mu rubanza No RC0158/09/TB/NYBA, ipariseri yaburanirwaga irimo inzu ya Mukamurenzi Perpetue na Niwemwana Laetitia.

Niwemungeri agaragaza ko atabyihereranye kuko yabimenyesheje inzego bireba, dore ko yandikiye Urwego rw’Umuvunyi, abimenyesha Umugenzuzi Mukuru w’inkiko, Umuyobozi w’Umurenge, Umunyamabanga Nshingwabikorwa w’Akarere, Guverineri n’abandi banyuranye bireba.

Mu ibaruwa yandikiye Umugenzuzi Mukuru w’inkiko mu Rukiko Rukuru, yagize ati “Turasaba kurenganurwa kuko nyuma yo gutsinda inshuro 4 zose tutaheshejwe ibyacu nk’uko imyanzuro y’urukiko yabikijije, ahubwo twahawe igice cya pariseri kandi twari twaratsindiye pariseri yose.”

Akomeza avuga ko n’ubwo batsinze, ngo bongeyemo ibindi bimenyetso by’ingingo nshya, ahagaragaye ko ikimenyetso bazanye cyari inyandiko mpimbano yerekana ubugure bwo kugurisha iyo sambu na Diyoseze ya Nyundo, ariko ikaza ari impimbano.

Nyuma yuko urukiko rwerekanye ko urupapuro rwerekana ko Turatsinze yaguze na Diyoseze ya Nyundo ari inyandiko mpimbano, urukiko rwafashe umwanzuro w’uko yajya gushaka ikindi gipapuro, hirengagizwa kubanza kuregera iyo nyandiko mpimbano yazanywe mu rukiko.

Ikindi ni uko muri izo manza 5 zose ziriho kashe mpuruza, ariko zikaba zitarahawe agaciro.

Nk’uko abo bavandimwe bakomeza babisaba, barasaba kurenganurwa banerekana urubanza batsinze ari rwo RC0053/011/TGI/RBV na RC0133/011/TGI/RBV, zose bazitsinda barezwe rumwe RC0273/010/TGI/RBV, ari narwo rwagaragayemo ibintu bidasanzwe, aho bagira bati “nyamuneka muturenganure.”

Hejuru ku ifoto:

Niwemwana Leatitia wambuwe isambu n’uwamwiciye (Ifoto/Muhongerwa)

Izuba Rirashe