Kuwa 18 Gicurasi uyu mwaka nibwo Padiri Padiri Ugirashebuja Octave, wigeze gukora muri Komisiyo y’Ubumwe n’Ubwiyunge yitabye Imana azize impanuka, akaba yarashyinguwe kuri uyu wa Kabiri tariki ya 22 Gicurasi 2012.

Ngo ntibyari byoroshye kumvisha Kiliziya ko Umupadiri wayo yakora muri gahunda zashyizweho na Leta, nyamara Padiri Ugirashebuja Octave yabashije kumvisha Abanyamadini ko Abakirisitu babaza imbere ntawe ubahamagaye bakeneye izindi nyigisho ngo barusheho kubanirana neza.

Ibi ni bimwe mu byavuzwe na Dr. Rose Mukankomeje ubwo yatangaga ubuhamya nk’umwe mu bakoranye na Padiri Octave Ugirashebuja muri Komisiyo y’Ubumwe n’Ubwiyunge. Byari mu muhango wo gushyingura uyu mupadiri wabarizwaga mu muryango w’Abayezuwiti kuri uyu wa Kabiri tariki ya 12 Gicurasi, n’ubwo yari yitabye Imana ku itariki ya 18 Giurasi 2012 azize impanuka ya moto.

Nk’uko byakomeje kugenda bivugwa n’abari bitabiriye uwo muhango, ngo ubwo yazaga muri iyi Komisiyo y’Ubumwe n’Ubwiyunge, yahakoze akazi gakomeye cyane, arayikomeza ndetse ashyiraho n’akanyamakuru kitwaga “Notre Lettre” ugenekereje mu kinyarwanda bivuze “Ibaruwa yacu”. Iki kinyamakuru ngo cyaje no gukura kibyara ikinyamakuru cyitwa “Ba intumwa y’ubumwe n’amahoro”, nacyo akajya acyandikamo.

Ubu buhamya kandi bwunzwemo na Tom Ndahiro wavuze ko nubwo atari Umuyezuwiti, afite aho ahurira nabo by’umwihariko abo muri Centre Christus. Ngo yibuka ko yahahungiye mu gihe cya Jenoside yakorewe Abatutsi, ndetse akanahaba igihe kinini abana na Padiri Octave.

Ngo kubera ko yakundaga kwandika ikintu cyose, Ndahiro yemeza ko yamufashije kwiga amadosiye ya mbere y’imanza za Jenoside. Gusa Ndahiro yanze kuvuga byinshi ahubwo yifuza ko hazabaho umunsi wihariye wo kuvuga uyu nyakwigendera, ndetse bakanamuvuga mu buryo bw’inyandiko kugira ngo abantu bazahore bibuka ibikorwa bye by’indashyikirwa.

Mu buzima bwe bwa Gikirisitu Padiri Octave Ugirashebuja yakundaga gusenga agafasha abantu bose cyane cyane abatishoboye. Yakundaga umuco ndetse nk’uko twabibwiwe n’uhagarariye Abayezuwiti mu Rwanda n’u Burundi, ngo yajyaga akina amakinamico akanahamiriza ngo abone amafaranga yo gufasha i Bujumbura ikigo cya Saint Albert. Ndetse ngo Kiliziya yo ntizamwibagirwa dore ko ariwe wubakishije Ikigo cy’Umuco,”Centre Culturelle Urumuri” cyanabereyemo umuhango wo gukaraba, dore ko yanashyinguwe hafi aho.

Uru rupfu rwe nk’uko byagaragaraga mu maso y’abari bitabiriye umuhango wo kumushyingura, rwababaje abantu benshi ndetse n’umuririmbyi Cecile Kayirebwa yohereje ubutumwa bw’akababaro, cyane ko Padiri Octave yabaye inshuti y’umuryango we bikomeye.

Padiri Octave Ugirashebuja, yakundaga kwandika akaba yaranditse igitabo yise “Rapports entre philosophie et poesie”, ngo igihe yumvaga imbaraga zibaye nke yavuze ko ashaka kwandika amateka y’Abayezuwiti (Jesuite) bo muri aka gace gusa ngo apfuye atarayarangiza.

Yavukiye muri Paruwasi ya Mibirizi muri Cyangugu hari ku itariki ya 17 Kamena mu mwaka w’1938, yiga mu mashuri yisumbuye i Kabgayi n’i Kansi nyuma aza kwiga ibya tewolojiya i Louvain mu Bubiligi. Yabaye Padiri ku wa 26 Nyakanga 1970. Yabonye impamyabumenyi y’ikirenga muri filozofiya, ndetse yanabaye umwarimu mu ma kaminuza atandukanye no muri za seminari nkuru.