Mu rwego rwo gutegurira hamwe icyumweru cya Hanga Umurimo giteganyijwe ku italiki ya 12 kugeza kuya 18 Ugushyingo 2012, Ikigo cy’igihu gishinzwe iterambere(RDB)gifatanyije na Minisiteri y’Urubyiruko n’Ikoranabuhanga bagiranye inama n’abafatanya bikorwa babo kuri uyu kuwa Kane 30 Kanama 2012 I Kigali.

Nk’uko bigaragazwa n’insanganyamatsiko y’iyi nama, icyumweru cya Hanga Umurimo kizaba kigamije gushishikariza Abanyarwanda kwihangira imirimo muri rusanga ariko by’umwihariko Urubyiruko n’Abagore.

Rwabukayire Augustin, ushinzwe amahugurwa muri gahunda ya Hanga umurimo, avuga ko Leta y’uRwanda yashyizeho uburyo bwinshi bwo korohereza abashaka kwihangira imirimo, hashyirwaho ikigega cyishingira ingwate, BDF mu mabanki, koroherezwa kubona inguzanyo mu Mirenge SACCO, kubahuza n’ibigo by’imari no kwibumbira mu makoperative.

Yibukije urubyiruko ko rutagomba gushingira ku bufasha bwa RDB gusa, ahubwo niba rubonye amahugurwa rugomba kujya kwishakira ahandi rushyirira mu bikorwa ubwo bumenyi.

Iyi nama ikaba yatumiwe mo ba rwiyemeza mirimo n’amatsinda y’abanyeshuri baharanira kwihangira imirimo, aho nabo bagombaga kugaragaza ibyo bazakora muri icyo cyumweru.

Ngamije Samson, umunyeshuri waje ahagarariye abandi bo mu ishuri ryisumbuye rya Lycee de Kigali bibumbiye muri “interpreneurship club”, avuga ko ategereje icyumweru cya hanga Umurimo, ngo kimuhuze n’abandi ba rwiyemeza mirimo bafite ubunararibonye mu guhanga no gucunga imishinga, . Yongeye ho ko ibitekerezo by’imishinga babifite ahubwo ikibura ari uburyo bwo kubibyaza umusaruro.

Iyi nama ikaba yari yitabiriwe n’ibigo by’abikorera, abanyeshuri bahagarariye abandi muri za Kaminuza n’abantu ku giti cyabo bafite inyota yo kwihangira umurimo.

Gahunda ya Hanga umurimo yashyizweho ngo ihangane n’ikibazo cy’ibura ry’akazi mu Banyarwanda bari mu kigero cyo gukora, ndetse ngo izane n’umuco wo gutanga imirimo aho gusaba imirimo.