Bamwe mu bakozi b’Akarere ka Rulindo barahiriye imbere y’Ubuyobozi kuzuzuza inshingano zabo.

Indahiro yarebaga bamwe mu bayobozi b’Akarera bamaze amezi 6 mu mirimo ya Leta barahiriye imbere y’Ubuyobozi bw’ako Karere, ikaba ishingiye ku guhamya igihango umunyagihugu agirana n’igihugu cye.

Nk’uko Umuyobozi w’Akarere ka Rulindo Kangwagye Justus wari uyoboye uyu muhango, yabitangaje kuwa Mbere, yagize ati “Iyi ndahiro ishingiye ku guhamya igihango umunyagihugu agirana n’igihugu cye, kugikorera nacyo kikamwishyura, ireba abakora bahembwa, ntabwo ireba abakorerabushake. Ni indahiro ikwiye guhabwa agaciro kadasanzwe. Ni inshingano zisuzumwa niba zarubahirijwe kandi ni isezerano rikomeye cyane”

Kangwagye yongeyeho ko iyi ndahiro ibahaye imbaraga zo gukora muri gahunda y’imyaka itanu akarere kihaye, kandi ko umusaruro wa buri wese ukenewe.

Iyi ndahiro iteganywa n’itegeko rusange rigenga abakozi ba leta, n’inzego z’imirimo ya leta, mu ngingo yayo ya 29, aho ivuga ko umukozi winjiye mu kazi arahira nyuma y’amezi atandatu arangije igeragezwa.