Muri gahunda y’icyumweru abana bigishwa ububi bwa ruswa, ubuyobozi bw’akarere ka Rulindo bubifashijwemo n’umuryango ugamije amahoro Shalom educating for peace, bwasoreje iki gikorwa mu murenge wa Rusiga aho abana bato barangajwe imbere n’abarimu babo bakoze urugendo rwo kwamagana ruswa banatanga ubutumwa buyamagana.

Tharcisse Rutayisire ushinzwe imiyoborere myiza muri Rulindo, ati ”Igiti kigororwa kikiri gito. Aba bana nibakura bazi ububi bwa ruswa tuzaba dufite icyizere cy’ejo hazaza ko ishobora kuzacika burundu kuko turi kuyirwanya duhereye mu mizi.”

Umwana witwa Iraguha Sarah waganiriye na IGIHE, yadutangarije azi ububi bwa ruswa n’ubwo atarabona aho bayitanga ariko ngo yumva babivuga akumva birababaje. Agira ati ”iyo numvise ko umwana w’umukobwa ajya gusaba akazi bakabanza kumusaba kuryamana na we numva bimbabaje cyane ariko urubyiruko dushyize hamwe tugahakanira abo bagizi ba nabi ndetse tukabashyira ahagaragara nta kabuza ruswa yacika.”

Basabose Jean de Dieu, umuyobozi wa Shalom educating for peace, avuga ko bataharanira amahoro ngo bayagereho mu gihe igihugu cyaba cyaramunzwe na ruswa; ariko akavuga ko ruswa izacika burundu binyuze mu kwigisha urubyiruko ububi bwayo cyane ko ari na rwo rugize umubare munini w’abaturage muri Afurika no mu Rwanda by’umwihariko.

Kuri ubu u Rwanda rwiyemeje kurwanya ruswa mu buryo bwose bushoboka. Icyegeranyo giherutse gushyirwa ahagaragara n’umuryango Transparancy International, cyashyize u Rwanda ku mwanya wa mbere mu karere ka Afurika y’Iburasirazuba mu bihugu birimo ruswa nke.