Nk’uko hirya no hino mu gihugu abanyeshuri tariki ya 17 Ukuboza abari mu itorero ry’Igihugu basozaga, abo mu Karere ka Rusizi Umuyobozi wako, Nzeyimana Oscar yabasabye gushingira ku masomo bahawe bakagaragaza impano bifitemo mu kubaka igihugu cyabo.

Mu Karere ka Rusizi hasojwe itorero ry’urubyiruko rw’abanyeshuri barangije amashuri yisumbuye kuri Site ya TTC Mururu hari abanyeshuri 526.

Nzeyimana yibukije uru rubyiruko uruhare rwarwo mu iterambere, abibutsa ko umusaruro wabonekaga mu Karere, ugomba kwikuba inshuro zingana n’uko bangana, kandi ko iki ari igihe cyo kugaragaza impano buri wese afite mu bushobozi bwo kubaka igihugu cyamubyaye.

Bibukijwe ko bagomba kurangwa no kwimakaza umuco w’ubwitange no gukorera ku mihigo, kwitanga nk’umuco wahoze uranga umunyarwanda mu gihe cyashize, bikajyana n’ubwuzuzanye bw’intore bugomba kuranga intore zagiye zitozwa mbere yabo.

Nzeyimana abasaba kuba urugero rwiza aho basubiye iwabo mu mirenge, kandi bagatekereza kwiga uburyo bwo kwihangira umurimo aho kwandika amabaruwa asaba akazi.

Mu ijambo ry’intore yo ku rugerero rwo mu Ndatwa mu mihigo za Rusizi, Nzamwita J.M V, mu ijwi ry’intore bagenzi be, yagaragaje ko nyuma y’uko baherewe ubumenyi bw’ibanze mu mashuri yisumbuye ngo ubu noneho bahawe ubundi bumenyi buzatuma barushaho kumva inshingano zabo mu iterambere ry’igihugu, bizatuma bakunda byisumbuyeho u Rwanda no kurukorera bikwiye umwenegihugu wese.

Iyi Ntore yavuze ko kugira ngo bizabashe kugerwaho bazihatira kwimakaza indangagaciro na kirazira z’umuco nyarwanda nk’uko bazigishijwe mu itorero barangije.

Ubwo, Bwana Shingiro Boris umutahira w’Intore ku rwego rw’Igihugu yashyikirizaga intore nkuru mu karere ka Rusizi, izi ntore zo k’urugerero, yashimangiye ko izi ari imbaraga nshya Akarere kungutse mu rwego rwo gukomeza guteza imbere no kumvikanisha gahunda za Leta, ati “ Nimwakire amaboko aje kunganira ayo mwari musanganywe kandi nta shiti ko muzagera kuri byinshi kuko ahari ubushake byose bishoboka”.

Umuyobozi w’Ingabo muri Rusizi na Nyamasheke, Col. Rutikanga Jean Bosco, yasabye izi ntore kurangwa n’ikinyabupfura, umwete , kwitanga, n’ubuhanga, muri gahunda z’igihugu, ati “ Nta bandi igihugu gifite bazabungabukanga umutekano w’igihugu n’inkiko zacyo atari urubyiruko nkamwe. Ni byiza ko ubumenyi muvanye mu itorero mwabukoresha mu kugera ku bisubizo by’ibibazo bikigaragara mu muryango nyarwanda, bityo imbaragaza zanyu zije zikenewe kandi mukwiye kuzikoresha”.

Urubyiruko rushoje itorero rwo ku rugero mu Karere ka Rusizi, rugera 2189 rugizwe n’abahungu 1126 n’abakobwa 1063.