Tariki ya karindwi Werurwe 2013, mu Karere ka Rwamagana niho umuryango RWARRI (Rwanda Rural Rehabilitation Initiative) washoreje igikorwa imazemo iminsi 4 imurika igerageza yakoze ku ikoreshwa ry’ifumbire mu kuzamura umusaruro w’ubuhinzi bw’ibigori, soya n’ibishyimbo.

Iki gikorwa cyatangiriye mu karere ka Kamonyi gikomereza mu Karere ka Muhanga, hakurikiraho aka Ngoma aka Rwamagana; mu ntego nyamukuru z’iki gikorwa hakaba harimo kugaragaza akamaro ko guhinga umuntu akoresheje ifumbire mvaruganda n’iy’imborera.

Iri gerageza ryakorewe ahantu 48, buri hantu hagenda hakorwa uturima dutatu dutandukanye. Buri Koperative ikorana n’umuryango RWARRI yagiye ihinga utwo turima, hamwe igashyiramo ifumbire y’imborera, ahandi igashyiramo ifumbire y’imborera ivanze n’iy’imvaruganda aha gatatu bakahahinga nta fumbire bashyizemo.

Umuyobozi wa RWARRI Bideri John atangaza atangaza ko nyuma yo kubona umusaruro uvuye muri iyo mirima yose basanze ahahinzwe hagashyirwamo ifumbire y’imborera ivanze n’iy’imvaruganda ari ho hatanze umusaruro ushimishije, ukubye inshuro zirenga ebyiri umusaruro wabonetse ahandi.

Umuyobozi wa koperative COHUNYA ikorera mu karere ka Rwamagana Mwadeka Immaculée, ati “Ndashimira cyane RWARRI kuko yatugejeje kuri byinshi. Yaduhaye amahugurwa, itugira inama umunsi ku munsi mu buryo twateza imbere ubuhinzi bwacu twongera umusaruro, kandi ntihwema no kudushakira isoko ry’umusaruro tuba twabonye.”

Mu ntego z’uyu muryango ubifashijwemo n’umuterankunga AGRA (Alliance for Green Revolution in Africa) harimo kuzamura umusaruro, gutanga ubumenyi (guhugura abanyamuryango) no kugeza umusaruro ku isoko. Kugeza ubu bafite koperative 64 n’amashyirahamwe 28 bakorana, bakaba bibanda ku bahinga ibishyimbo, soya n’ibigori.