Ahagana saa kumi zo ku wa 22 Ukwakira 2012, ni bwo indege yo mu bwoko bwa CRJ900 Next Generation ikorwa n’ikompanyi yo muri Canada izwi nka Bombardier yasesekaye ku kibuga cy’indege mpuzamahanga cya Kigali i Kanombe.

Iyi ndege ni imwe muri ebyiri zo muri ubu bwoko zari zitegerejwe n’ikompanyi yo gutwara abantu n’ibintu mu kirere ya RwandAir, yiyongera kuri eshanu yari isanganwe.

Umuyobozi mukuru wa RwandAir, Mirenge John, avuga ko iyi ndege izafasha kompanyi mu ngendo za bugufi mu karere ndetse zikaniyongera. Ati “Iyi ndege itwara abagenzi 75 kandi ntabwo inywa cyane nk’izindi. Izafasha mu kongera ingendo mu karere, ndetse twongere n’aho tuzajya twerekeza muri Afurika.”

Nsengiyumva Albert, Minisitiri w’Ibikorwa remezo, yavuze ko iyi ndege ari ikimenyetso ko u Rwanda rukomeje guharanira kuba ku isonga mu bwikorezi bwo mu kirere aho ruhangana n’izindi kompanyi zo mu bihugu byo mu karere. Yagize ati “RwandAir ikomeje guharanira kuba ku isonga kandi byose bigaragaza iterambere ryihutishwa mu Rwanda kuko n’ubwo izindi kompanyi zirikomeje kwiyongera mu gihugu ni uko RwandAir igenda igira imbaraga.”

Indege yo muri ubu bwoko bwa CRJ900 Next Generation ifite agaciro karenga miliyoni 20 z’amadolari ya Amerika, kandi RwandAir itegereje indi nka yo izagera i Kigali iturutse i Quebec muri Canada ku wa 5 Ugushyingo 2012.

Kugeza ubu RwandAir imaze kugira indege esheshatu zayo, ndetse mu kwezi gutaha izaba igize indwi, ubuyobozi bwayo bukaba buvuga ko zizayifasha mu gutanga serivisi nziza ari na ko yongera ingendo zayo cyane cyane mu karere.