Sosiyete sivile nyarwanda yakusanyije ibitekerezo byakongerwa muri gahunda y’imbaturabukungu ya kabiri (EDPRS II), gahunda iri gutegurwa na Guverinoma y’u Rwanda hagamijwe kuzamura imibereho y’abanyarwanda.

Mu gusoza inama y’ imisni ibiri yahuje Sosiyete sivile na Minisiteri y’imari n’igenamigambi n’abafatanyabikorwa batandukanye ku itariki ya 18 Ukwakira 2012 kugera ku ya 19 Ukwakira, abari bitabiriye iyi nama batangaje ko Sosiyeti sivili yatanze ibitekerezo byazitabwaho mu kuzamura iterambere ry’ igihugu n’ imibereho myiza y’abaturage.

Aflodis Kagaba, wari waje mu rwego rwa sosiyeti sivili ishami riteza imbere ubuzima, yabwiye abanyamakuru ko batanze ibitekerezo mu kuzibanda ku kuringaniza imbyaro, kuko hatabaho iterambere nta kuringaniza imbyaro byabayeho. Kagaba akomeza anavuga ko hagomba gushyirwa imbaraga mu kurwanya SIDA, hakigishwa urubyiruko uburyo bwo kuyirinda no gusobanukirwa neza ubuzima bw’ imyororokere.

Gatete Kevin, ukorera umuryango mpuzamahanga ushinzwe kurwanya ubukene, yatangaje ko hashyizweho ihuriro mu gufatanya mu bikorwa byo kurwanya ubukene mu Rwanda no gufatanya na Leta mu bikorwa by’iterambere; bityo sosiyete sivili igafasha Leta muri gahunda y’ iterambere no kurikurikirana.

Sharad Gurapad Mahajan, umuyobozi w’ umuryango mpuzamahanga OXFAM wateguye amahugurwa yatangaje ko amahugurwa yari agamije guhuza abagize Sosiyeti sivili, kurebera hamwe ibyakongerwamo ingufu mu gutegura gahunda y’ imbaturabukungu, kuko imwe muri iyi miryango itabogamiye kuri Leta ikorana n’abaturage ikabona ibyakongerwamo ingufu.

Avuga ko umuryango ahagarariye, OXFAM, usanzwe ukorana n’abaturage muri gahunda zo kwiteza imbere, bityo ko kugira uruhare mu gutanga ibitekerezo muri gahunda yaLeta y’imbaturabukungu bizagira akamaro gakomeye ku iterambere ry’Abanyarwanda.

Yavuze ko aya mahugurwa yuhuriyemo abagize Sosiyeti sivili bari mu nzego z’ubuzima, u butabera, ubukungu, n’ abandi.

Sosiyete sivile nyarwanda yagaragaje ko ifite ubushake bwo gutanga umusanzu wayo mu gushyigikira EDPRS, hagamijwe kwita ku buzima bw’Igihugu muri gahumda zose.

Ibi bitekerezo ngo bizafasha kugera ku iterambere ryihuse kuburyo umubare w’abaturage bakiri munsi y’ umurongo w’ ubukene uzagabanywa na gahunda y’imbaturabukungu izamara igihe kirekire.