Polisi mu gihugu cy’u Buhinde, yataye muri yombi abanyeshuri batatu b’Abanyarwanda ibakekaho ’kwitwara nabi ku mukobwa’ ahitwa Jalandhar mu majyaruguru y’uburengerazuba bw’u Buhinde.

Ikinyamakuru Global times dukesha iyi nkuru, cyanditse ko itangazamakuru ryo muri aka gace rivuga ko komiseri wungirije wa Polisi Dalvir Singh yaritangarije ati "Aba banyeshuri batatu b’Abanyarwanda bafashwe nyuma y’uko abaturage babafatiye mu cyaha cyo kwitwara nabi ku mukobwa mu isoko."

Iki kinyamakuru kivuga ko abaturage ari bo bahamagaye Polisi igata muri yombi aba banyeshuri bigaga muri Kaminuza imwe mu zigenga zo muri aka gace.

’Imyitwarire mibi imbere y’umukobwa’ ishinjwa aba banyeshuri, biravugwa ko ari ijyanye n’uko baba barashatse kumufata ku ngufu.

Ibi bibaye nyuma y’igihe kigera ku kwezi hari Umunyarwandakazi ufatiwe ku ngufu mu murwa mukuru w’u Buhinde New Delhi, hari ku itariki ya gatatu Ukuboza 2012.