U Rwanda na Danemark byasinye amasezerano y’ ubufatanye agamije gishyiraho ikigo kizafasha mu kongerera ubushobozi n’ubumenyi Ingabo z’ u Rwanda zifasha mu bikorwa byo gutabara mu Karere k’Afurika y’ iburasirazuba kagizwe n’ ibihugu 13.

Aya masezerano yasinywe ku ruhande rw’ U Rwanda n’ ubuyobozi bwa Minisiteri y’ Ingabo hamwe n’ umunyamabanga uhoraho muri Minisiteri y’ ububanyi n’amahanga. Ku ruhande rwa Danemark yasinywe n’ uhagarariye Ambasade ya Danemark mu Rwanda ufite icyicaro i Kampala, hamwe na MG.Kurt Mosgaard umuyobozi uhagarariye Ingabo za Danemark mu bufatanye bw’ umutekano mpuzamahanga.

MG.Kurt Mosgaard, yavuze ko aya masezerano ari mu rwego rwo gufasha guteza imbere Afurika binyuze mu ngabo. Yavuze ko bahisemo gukorana n’ u Rwanda kuko babona hari imikoranire myiza hagati y’ ibihugu byombi.

Yasobanuye ko aya masezerano akubiyemo inkunga y’ ibikoresho no gutegura ingabo mu bijyanye n’ imyitozo, bikazatwara amafaranga ari ari hagati ya miliyoni 25 na 27 z’amadorari y’Amerika.

Maj. Gen Frank Mushyo Kamanzi umuyobozi w’ Ishuri rya Gisirikare rya Gako, yavuze ko amasezerano yasinywe azafasha kubaka ubushobozi bw’ ingabo z’u Rwanda.

Yagize ati: ”Aya masezerano ni ayo kudufasha kubaka ubushobozi bwo gushobora gutabara mu buryo bwihuse mu Karere dufatanyije na Danemark. Aya masezerano azadufasha mu kubaka uwo mutwe, kuwutoza no kubaka inyubako ikenewe kugira ngo uyu mutwe ubone aho ukorera wuzuze inshingano zawo.”

Yakomeje agira ati: ”Kugeza ubu uyu mutwe turateganya ko uzaba ukorera i Gako aho dufite ibikorwa bya gisirikari”.Yavuze ko uyu mutwe uzaba uteguye ku buryo uzajya ufasha ahantu hari ibibazo birimo ibiza, n’ ibindi bibazo muri aka karere k’Afurika. Yavuze ko n’ ubundi ingabo z’ u Rwanda zisanzwe zifasha mu butabazi no kugarura amahoro aho zikorana n’Umuryango w’ Afurika Yunze Ubumwe (African union), hamwe n’ Umuryango w’Abibumbye ( UN) muri Sudani, muri Haiti n’ahandi. Avuga ko uyu mutwe uzafasha gukora ibyo bikorwa mu buryo bwihuse kubera ko uzaba uteguye unafite ibyangombwa.

Kamanzi kandi yavuze ko uyu mutwe wa gisirikare uje ukurikira uwo mu gihugu cya Uganda n’ uwo muri Kenya yari isanzwe mu karere, ukazaba uri mu rwego rwa Brigade.

Ibihugu byo mu Karere bikorana n’ umutwe w’ingabo zishyize hamwe (East African Standby Brigade) birimo u Burundi, u Rwanda, Sudan, Comores, Djibouti, Ethiopia, Kenya, Rwanda,Seychelles, Somalia, Sudan, na Uganda.

Biteganyijwe ko ibi bikorwa bihita bitangira ku buryo mu mwaka wa 2014 abasirikare ba mbere bazaba bamaze guhugurwa.
Marie Chantal Nyirabera