Abaminisitiri bashinzwe umutekano mu bihugu by’akarere k’Afurika y’i Burasirazuba, bateraniye hano i Kigali mu rwego rwo kurebera hamwe uburyo ibibazo by’umutekano muke bikiboneka muri ibi bihugu, byahashywa biciye mu bufatanye bw’ibi bihugu.

Muri iyi nama hibanzwe ku bibazo by’umutekano muke ukirangwa muri bimwe muri ibi bihugu nko muri Somaliya, nyamara ugasanga ibihugu nka Uganda, Kenya ndetse n’u Burundi aribyo byonyine bigifite ingabo zirwanya umutwe wa al-Shabaab.

Umunyamabanga mukuru w’umuryango w’Afurika y’i Burasirazuba Ambasaderi Richard Sezibera, yatangaje ko kuba u Rwanda na Tanzaniya bidafite ingabo muri Somaliya bitavuze ko ntaruhare bitanga, kuko ngo bifasha mu guhugura bamwe mu bapolisi babungabunga amahoro muri iki gihugu ndetse ngo hakaba hari n’ubundi bufasha ibi bihugu bitanga.

Uwungirije Minisitiri w’umutekano mu gihugu cya Tanzaniya Silima Pereira, yatangaje ko uko ibi bihugu byo mu muryango w’Afurika y’i burasirazuba biharanira guteza imbere ubucuruzi bubihuza, ari nako bigomba gucunga umutekano w’ibyo bicuruzwa ndetse utaretse n’ababituye muri rusange.

Muri iyi nama kandi aba bayobozi bashinzwe umutekano muri ibi bihugu, bemeranyije ko bagomba kuganira n’igihugu cya Repubulika Iharanira Demokarasi ya Congo, kugira ngo bashakire hamwe umuti w’ibibazo bikirangwa ku mipaka ibi bihugu bihuriraho nacyo dore ko ngo hari abifashisha ibibazo by’umutekano muke uri muri icyi gihugu bagahungirayo mu gihe baba bakoze ibyaha muri bimwe muri ibi bihugu.

Aba bashyitsi bitabiriye iyi nama, bafashe umunota umwe wo guha icyubahiro nyakwigendera Meles Zenawi wari Minisitiri w’intebe wa Etiyopiya witabye Imana kubera uruhare rukomeye yagize mu kugarura umutekano muri aka karere, cyane cyane mu gihugu cya Somaliya dore ko iki gihugu cye gifiye ingabo zirwanya umutwe wa al-Shabaab.

Hejuru ku ifoto: Richard Sezibera, Umunyamabanga mukuru w’Umuryango w’Ibihugu by’Afurika y’i Burasirazuba