Binyujijwe muri Minisiteri y’uburezi, kuwa Kabiri ku itariki ya 10 Ukwakira 2012 mu Rwanda hatangijwe ubukangurambaga bw’ukwezi bwashyizeho ikigega kizajya gitera inkunga ibikorwa by’ubushakashatsi n’imishinga ishobora kubyara umusaruro ku nyungu rusange.

U Rwanda, ku bufatanye na komisiyo y’ubukungu ya LONI ishinzwe Afurika, iki kigega kizajya gitera inkunga ubushakashatsi, gitangiranye umutungo w’ibanze w’amafaranga y’u Rwanda miliyoni 375.

Ubukangurambaga bwatangirijwe muri kaminuza Nkuru y’u Rwanda bukazakomereza no mu yandi mashuri, bwibanda ku rubyiruko ruri mu mashuri n’ururangije.

Nk’uko byatangajwe n’Umuyobozi mukuru muri Minisiteri y’Uburezi mu Rwanda, Dr Marie Christine Gasingirwa, intego y’iki kigega cyashizweho ni uguteza imbere umuco wo guhanga udushya, guhanga imirimo no gushyira mu bikorwa ubumenyi bwo mu ishuri.

Gasingirwa yavuze ko itoranywa ry’imishinga rizajya rikorwa hashingiwe ku mishinga yo mu buhinzi, itumanaho n’ikoranabuhanga, hakiyongeraho n’iyo mu bukorikori.

Gasingirwa yavuze ko umushinga uzemezwa n’itsinda ry’impuguke uzaterwa inkunga ya miliyoni 30 y’amafaranga y’u Rwanda. Ariko kuko amafaranga ari make mu kigega, icyiciro cya mbere hazatoranywa imishinga mike.

Gasingirwa yatangaje ko ari ngombwa ko n’abikorera bashora imari muri ibyo bikorwa.

Ubu urubyiruko rwiyumvamo impano yo guhanga udushya, basabwa gutangira kuzana imishinga yabo ku buyobozi bw’ikigega.

Soteri Gatera, wari uhagarariye komisiyo ya LONI, yavuze ko iki kigega kibaye icya mbere muri Afurika ari ikimenyetso ko u Rwanda rwumva kandi ruha agaciro ishoramari mu by’ubwenge.

Ubu bukangurambaga bwibanda ku rubyiruko ruri mu mashuri n’ururangije bwatangiye uyu munsi muri Kaminuza Nkuru y’uRwanda bukazakomereza no mu yandi mashuri n’ibigo by’urubyiruko.

Imikorere irambuye y’iki kigega igaragara ku rubuga rwa Minisiteri y’Uburezi mu (Rwandawww.mineduc.gov.rw/rief).