Mu gihe Umushinga Reach wakoreraga mu turere turindwi tw’igihugu ugiye gucyura igihe, abayobozi bawo baratangaza ko ku bufatanye n’inzego zitandukanye z’ubuyobozi washoboye kuvana abana bagera ku 8500 mu mirimo mibi.

Ibi byavugiwe mu nama y’iminsi ibiri yatangiye ku ya gatandatu Gashyantere 2013 i Kigali iteguwe na Reach ku bufatanye n’Umuryango mpuzamahanga Winrock, hagamijwe gusuzuma ibyagezweho n’umushinga no gufata ingamba z’uburyo kurwanya ikoreshwa ry’abana byazakomeza nyuma y’uko umushinga urangira.

Muramutsa Felix, umukozi wa Reach, yatangaje ko abana 8500 bavanywe mu mirimo yari ibangamiye ubuzima bwabo. Ati “Nta mpungenge z’uko bazasubira mu mirimo mibi kuko twahaye ubumenyi inzego zitandukanye ku kurwanya iyi mirimo ku buryo bazabugeza ku bandi.”

Umuyobozi ushinzwe Umurimo muri Minisiteri y’Abakozi ba Leta n’Umurimo Anna Mugabo, yavuze ko hari ingamba Leta yafashe mu kurwanya ikoreshwa ry’abana. Izo ngamba zirimo gutangiza gahunda y’uburezi bw’ibanze bw’imyaka icyenda, gusinya amasezerano mpuzamahanga no gushyiraho amategeko ku rwego rw’igihugu abuza ikoreshwa ry’abana.

Umushinga Reach watangiye mu mwaka w’2009 mu Rwanda. Ukorera mu turere twa Nyarugenge, Nyamasheke, Nyaruguru, Rubavu, Nyagatare, Gicumbi na Kayonza.