Mu cyumweru cyahariwe kurwanya ruswa n’akarengane, kuri uyu wa gatanu Umuvunyi Mukuru, Aloysie Cyanzayire yakanguriye urubyiruko kurwanya ruswa n’akarengane nk’imungu ikomeye y’ubukungu bw’Igihugu.

Kuri uyu wa gatanu mbere y’uko Urwego rw’Umuvunyi rugeza ku rubyiruko ubutumwa bw’umunsi, byabanjirijwe n’ urugendo rwo kwamagana ruswa n’akarengane rwaturutse ku kigo cy’igihugu cy’iterambere RDB kugera kuri Petit Stade.

Umuvunyi Mukuru Aloysie CYanzayire akangurira urubyiruko kurwanya ruswa n'akarengane

Umuvunyi Mukuru Aloysie Cyanzayire yasabye urubyiruko kuba umusemburo w’iterambere rirambye, bakumira icyasubiza u Rwanda inyuma cyane cyane ruswa n’akarengane, ati “ Urubyiruko ni mwe mbaraga z’u Rwanda z’ejo hazaza ni mwe mugomba kugira uruhare runini mu gukomera ku ndangagaciro z’umunyarwanda, mukanga umugayo mukumira ruswa n’akarengane n’ibindi bidindiza iterambere.”

Umuvunyi Mukuru Cyanzayire yasezeranyije urubyiruko ko Urwego rw’Umuvunyi ruzakomeza gukora uko rushoboye rurwanya ruswa n’akarengane bigacika burundu mu Rwanda.
Kalisa Jean de la Croix, umwe mu rubyiruko rwari rwitabiriye uyu munsi yatangarije IGIHE ko kurwanya ruswa n’akarengane bitoroshye ariko ko ahari ubushake byose bishoboka.
Ahanini icyo abantu basabwa mu kurwanya ruswa n’akarengane ni ukudahishira aho babyumvise.

Abanyarwanda bari mu cyumweru cyo kurwanya ruswa n’akarengane, icyumweru kirimo kwizihirizwa mu Rwanda ku rwego rwa Afurika.

Mu bushakashatsi bwakozwe na Transparency International bwakozwe mu kureba uko ibihugu byo ku isi bihagaze mu kurwanya ruswa n’akarengane mu 2012, u Rwanda rwaje ku mwanya wa 50 mu bihugu 176, ariko rukaza ku mwanya wa mbere mu karere k’Afurika y’Iburasirazuba.