Mu rwego rwo gukumira ibiyobyabwenge no kurwanya icyorezo cya SIDA mu rubyiruko, ikigo cy’urubyiruko cya Rulindo mu karere ka Rulindo tariki ya 3 Ugushyingo, cyateguye urugendo rugamije kwigisha urubyiruko ingaruka zo kwishora mu biyobyabwenge.

Iki kigo cyafashe iyi gahunda yo gukora urugendo, mu rwego rwo kwereka urubyiruko rutuye Akarere ka Rulindo n’u Rwanda muri rusange kwirinda gukoresha ibiyobyabwe, kuko ngo akenshi usanga ababyishoyemo badashobora kwiteza imbere, ugasanga abakobwa bahavanye inda zitateguwe, byanabaviramo kuhandurira indwara ya SIDA.

Kayiranga Gaston, Umuyobozi w’ikigo cy’urubyiruko cya Rulindo, yatangarije IGIHE ko urubyiruko nk’amaboko y’Igihugu, rugomba gusobanurirwa ibibi byo gukoresha ibiyobyabwenge kuko ngo uwabikoresheje ashobora gufatwa n’indwara zitandukanye bityo ugasanga igihugu cyihahombeye.

Kayiranga yagize ati “Iki kigo cyaje gikenewe kuko urubyiruko rutandukanye ruva muri aka karere no mu Rwanda, turufasha kwihangira umurimo no gucunga iyo rwahanze, tunarwigisha ibikorwa by’ikoranabuhanga nko gukoresha mudasobwa n’indi mirimo iha urubyiruko icyerekezo cy’u Rwanda cy’iterambere muri vision 2020.”

Kayiranga yatangaje kandi ko akenshi usanga urubyiruko rukoresha ibiyobyabwenge, ari urudafite akazi kuko usanga rwibwira ko kunywa ibiyobyabwenge bituma ruva mu bibazo rusanganganywe, arukangurira gukora akazi kose kuko karuteza imbere.

Mahoro Onesphore w’imyaka 25 uvuga ko yakoresheje ibiyobabwenge imyaka ine, yatangarije IGIHE ko usanga urubyiruko rwinshi rukoresha ibiyobyabwenge rwibwira ko rushobora kugira ingufu nyamara ugasanga ari ukwibeshya.

Mahoro yagize ati “natangiye gukoresha urumogi niga mu mwaka wa kabiri w’amashuri yisumbuye mbwirwa ko nzabona amanota menshi ndetse nkagira n’imbara nyinshi, ariko nyuma narushijeho kuba uwanyuma, nari maze kurwara indwara nyinshi, ubu maze kuba umusore kuko maze imyaka ibiri nduretse kandi ubu ngeze muri iki kigo, nigishijwe gukora akazi nsigaye nzi gutunganya imisatsi y’abantu.”

Ikigo cy’urubyiruko cya Rulindo cyatangiye gukora muri Mutarama 2012, cyakira urubyiruko ruri hagati ya 400 na 500 ku munsi mu rwego rwo kubigisha kwiteza imbere, kwirinda indwara ya SIDA n’ibiyobyabwenge. Kinatera inkunga urubyiruko rwagaragaje imishinga myiza kibifashijwemo n’Inama nkuru y’urubyiruko mu Rwanda.