Ubwo urubanza rwe rwasubukurwaga kuri uyu wa Gatanu tariki ya 22 Werurwe 2013, Pasiteri Uwinkindi Jean yemeye ko urutonde rw’abatangabuhamya yari yanze kugaragaza agiye kurusubiramo agatoranyamo ab’ingenzi, ku buryo bitarenze tariki ya 26 Werurwe azaba yarugejeje ku rukiko n’Ubushinjacyaha.

Mu gihe kitari gito, ubwunganizi bwa Uwinkindi bwavugaga ko abatangabuhamya bakenewe batazwi neza, Ubushinjacyaha ntibwabyemera kuko hari abari batanzwe mu rukiko rwa Arusha bazwi amazina ndetse abagera kuri 49 bakaba barahakanye kuzaza gutanga ubuhamya bwabo mu Rwanda.

Byaje kurangira Uwinkindi ubwe yamereye urukiko kimwe n’ubushinjacyaha ko ku wa kabiri tariki ya 26 Werurwe, azaba yabagejejeho urutonde rw’abatangabuhamya yifuza ko bazabazwa, akazaba yayisubiyemo kuko ubusanzwe avuga ko bagera kuri 90 babarizwa mu bihugu bigera kuri bitanu ku Isi.

Mu rubanza rw’uyu munsi, hagarutswe ku nzitizi yatanze hamwe n’abunganizi be zitatuma urubanza ruburanishwa mu mizi.

Usibye izari zagaragajwe mu rubanza rw’ubushize zirimo ko abatangabuhamya be batabajijwe kubera habuze amikoro yo kubageraho mu gihe bari mu bihugu byinshi ku Isi,Uwinkindi yongeyeho indi nzitizi y’uko dosiye ye iri mu ndimi z’amahanga atumva.

Yasabye ubushinjacyaha kumuha dosiye isemuye mu Kinyarwanda kugira ngo azabone uko ayiga bitamugoye.

Ubushinjacyaha bwasobanuye ko kuba inyandiko y’ikirego iri mu ndimi zivanze birimo kwirinda ko yatakaza umwimerere wayo, kuko yakozwe mu zindi ndimi kandi ko itateguriwe Uwinkindi wenyine, cyakora ngo iki cyifuzo ubushinjacyaha buzagisuzuma.

Ubwunganizi bwa Uwinkindi kandi bwasabye ko hashyirwaho itsinda ryigenga ryo gukora iperereza ku byaha aregwa, aha basobanurirwa ko ibyo basaba bidateganywa n’amategeko kuko urwego rw’ubugenzacyaha bukorera muri Polisi ari rwo rufite inshingano zo gushaka ibimenyetso bishinja n’ibishinjura.

Urukiko rwafashe umwanzuro ko tariki ya 16 Mata 2013, ari bwo hazafatwa umwanzuro wa nyuma ku nzitizi zagaragajwe.

Uwinkindi Jean akurikiranweho ibyaha bya Jenoside n’ibyibasiye inyokomuntu byakorewe ahitwaga Kanzenze. Yagejejwe mu Rwanda tariki ya 19 Mata 2012, aturutse mu Rukiko mpuzamahanga rwashyiriweho u Rwanda rukorera i Arusha.