Zigama Credit and Savings Society, Koperative y’Abasirikare, Abapolisi, n’Abacungagereza, igiye gukora inyigo y’ukuntu yabasha gukemura ikibazo cy’inguzanyo ku banyamuryango bayo ihereye ahanini ku kugabanya inyungu yakwa ku nguzanyo, nk’uko byatangajwe na Dr James Ndahiro, Umuyobozi Mukuru w’iyi Banki.

Ibi yabitangaje kuri uyu wa Kane tariki 03 Gicurasi ubwo abanyamuryango ba Zigama CSS bari bamaze kugirana inama rusange, ku cyicaro cya Minisiteri y’Ingabo ku Kimihurura.

Dr Ndahiro yagize ati: “Tugiye gucyemura ikibazo cyo kubona inguzanyo ku buryo bworoheye buri munyamuryango wacu, dutanga inguzanyo z’amafaranga menshi kubazifuza, kuko icyo tugamije cyane ni uko abasirikare bato nabo bagira imibereho myiza iteye imbere kandi kubigeraho ni uko abakuru nabo babona inguzanyo kugira ngo haboneke amafaranga yo gufasha abato.”

Ikindi Dr Ndahiro yatangaje ni uko Zigama CSS yungutse agera kuri Miliyari ebyiri z’amafaranga y’u Rwanda, n’ubwo umubare w’amafaranga asabwaho inguzanyo akiri menshi cyane kurusha abitswa, aho habitswa miliyari 24 mu gihe hakwa inguzanyo zigera kuri miliyari 56 z’Amanyarwanda. Mu rwego rwo gukemura icyo kibazo, Zigama CSS ikaba igomba gushora imari yayo ikabyara inyungu, kuko kuguriza ibanje kugura amafaranga hanze nayo biyihendesha.

Ikindi cyo kwishimirwa Dr Ndahiro yatangaje ni uko Zigama CSS imaze gufasha 70% by’abanyamuryango bayo gucyemura ikibazo cy’amacumbi.

Muri iyi nama yahuzaga abahagarariye abanyamuryango ba Zigama CSS, mu byiciro byose, birimo abasirikare, abapolisi, abacungagereza, ndetse n’abaturage basanzwe, haganiriwe ku bibazo biri mu mikorere yose ya banki yabo, cyane cyane bibanda ku buryo yabasha kwigarurira abanyamuryango bayo bajyana imishinga minini hirya mu yandi mabanki, bakaba bahabwa inguzanyo ku buryo buboroheye, bikabazamura mu bikorwa byabo, ndetse bikazamura na banki yabo.

Kuri ubu iyo koperative yashinzwe mu 1997 imaze kugera ku rwego rushimishije, aho ifite abanyamuryango barenga 60 000, amashami 14 n’abakozi 120 mu gihugu hose.

Foto:MOD