Byaturutse ku rutonde rwakozwe n’urubuga Taste Atlas ku ndyo nziza z’umwaka wa 2022 zatondekanyijwe hakurikijwe ibihugu. Ibiribwa byo mu Bufaransa byaje ku mwanya wa cyenda inyuma ya Leta Zunze Ubumwe za Amerika.

Byarakaje bamwe mu Bafaransa ndetse bagaragaza ko batizeye uburyo bwakoreshejwe n’urwo rubuga rusanzwe ruzwiho kumenyekanisha indyo zitandukanye hirya no hino ku Isi.

Hari uwagize ati “Nta kuntu twatsindwa mu gikombe cy’Isi hanyuma ngo aba nabo badusuzugure aka kageni!”

Undi yagize ati “u Bufaransa bwaje inyuma ya Leta Zunze Ubumwe za Amerika? Ntabwo mbyumva”.

Impaka zimaze kuba ndende, Taste Atlas yaje kwisobanura, ivuga ko yo ikora urutonde rw’ibihugu biteka neza hagendewe ku majwi y’abagiye batora mu gihe cy’umwaka wose.

Icyakora, urwo rubuga rwavuze ko rutajya rubara amajwi y’abantu bo mu gihugu runaka, iyo batoye ibiryo by’iwabo ariko bajya gutora iby’ahandi bakabiha amanota make.

Kuri uru rutonde, igihugu kiza ku mwanya wa mbere mu guteka indyo zaryoheye benshi ni u Butaliyani, gikurikirwa n’u Bugereki, Espagne, u Buyapani, u Buhinde, Mexique na Turikiya.

Muri Afurika igihugu kiri hafi ni Algeria iza ku mwanya wa 34, Afurika y’Epfo iza ku mwanya wa 36 na Tunisia ku mwanya wa 48.

Indyo y'Abataliyani niyo yaje imbere mu zakunzwe cyane mu 2022