Urutonde rwakozwe n’ikinyamakuru Jeune Afrique mu nomero yacyo
2840 yasohotse hagati y’itariki ya 14 n’iya 20 Kamena 2015 rushyira Perezida Jacob Zuma ku mwanya wa mbere mu bakuru b’ibihugu bahembwa menshi muri Afurika aho ahembwa amayero 16130 buri kwezi.

Umushahara wa Perezida Zuma uruta uwa Perezida François Hollande w’u Bufaranse, uwa Vladimir Poutine w’ u Burusiya n’uwa Dilma Roussef wa Brésil.

Ku Isi, Barack Obama wa Leta Zunze Ubumwe za Amerika aza ku mwanya wa mbere aho ahembwa amayero 29565 buri kwezi ( asaga miliyoni 13 z’amafaranga y’u Rwanda), Stephen Harper wa Canada akaza ku mwanya wa kabiri n’amayero 19 217 ku kwezi, mu gihe Angela Merkel, Chancelier w’u Budage we ahembwa amayero 17 325.

8 ba mbere muri Afurika

1. Jacob Zuma wa Afurika y’Epfo aza ku mwanya wa mbere aho ahembwa amayero 16130 (asaga miliyoni 23 z’amafaranga y’u Rwanda).

2. Beji Caid Essebsi wa Tuniziya ahembwa amayero 13 712 (asaga miliyoni 11 z’amafaranga y’u Rwanda.

3. Uhuru Kenyatta wa Kenya aza ku mwanya wa gatatu muri Afurika no kuwa mbere mu bahembwa menshi buri kwezi muri Afurika y’Iburasirazuba aho abona umushahara ungana n’amayero 9756 (asaga miliyoni 9 z’amafaranga y’u Rwanda).

4. Hifikepunhe Pohamba wa Namibia ahembwa amayero 9 217 buri kwezi (asaga miliyoni 7 z’amafaranga y’u Rwanda).

5. Ikililou Dhoinine uyobora Ibirwa bya Comores ahembwa amayero 8130 buri kwezi ( asaga miliyoni 6 z’amafaranga y’u Rwanda).

6. Denis Sessou Nguesso wa Congo Brazaville ahembwa amayero 7622 buri kwezi (asaga miliyoni 6 z’amafaranga y’u Rwanda).

7. Alassane Ouattara wa Cote d’Ivoire ahembwa amayero 7300 (hafi miliyoni 6 z’amafaranga y’u Rwanda).

8. Kailash Purryag uyobora Ikirwa cya Maurice ahembwa amayero 6954 (asaga miliyoni 5 n’ibihumbi 632).

Perezida Zuma uza ku mwanya wa mbere, yongerewe umushahara tariki ya 4 Kamena 2015 nyuma y’uko abadepite bo mu ishyaka rye rya ANC (African National Congress) bazamuye impaka z’uko akwiye kongererwa 5% ku mushahara we w’umwaka.

Uyu mushahara w’aba baperezida n’abayobozi ba za guverinoma wiyongeraho izindi nyongera zirimo amafaranga abafasha kwakira abashyitsi babagenderera buri kwezi n’andi ashyirwa mu byiciroarimo agahimbazamusyi, ayo kubatunga n’ibindi.

Deus Ntakirutimana
[email protected]
Twitter:@NtakirutaDeus