• Yaguze inka ku mafaranga ibihumbi 100 yabonye bimugoye
• Yayiguze ishonje ayigendesha urugendo rurerure
• Imaze kugenda amasaha 4 yaragandaye nyirayo yifata mapfubyi
• Yasambye hafi amasaha 3, ishusha nk’ishizemo umwuka
• Nyirayo nta cyizere afite cyo kuzahuka

Uruhurirane rw’inzara n’urugendo rurerure byagandaje mu muhanda inka y’umugabo witwa Ndagijimana Yohani utuye mu karere ka Gisagara mu ntara y’Amajyepfo, bikoma mu nkokora umugambi yari amaranye igihe wo korora inka ikamukiza ubworo.

Abanyarwanda bagira imigani ikomeye bacira umuntu wahuye n’akaga gakomeye kakamubuza kugera ku ntego yari atumbiriye.

Iyo ni nka : Arimo gishegesha ntavura,urwishe ya nka ruracyayirimo, aho umutindi yanitse ntiriva n’indi.

Iyi migani niyo bamwe mu bagenzi baciraga uyu mugabo wari wumiye ku muhanda aragiye inka isamba.

Ndagijimana yahuye n’ikigeragezo gikomeye ubwo yavaga kugura inka ahitwa I Kansi mu karere ka Gisagara, ageze mu ishyamba riri mu kagari ka Agahabwa mu murenge wa Kigembe, umunaniro w’urugendo rurerure n’inzara birayiganza yikubita hasi ananirwa kuyegura.

Uyu mugabo uvuga ko yari amaze gukora urugendo rw’amasaha asaga 4 ayishoreye, yemeza ko umuturage bayiguze atayitagaho bihagije, ayigura amafaranga ibihumbi 100 ngo ayondore umuryango we ubone amata n’ifumbire.

IGIHE yasanze uyu mugabo muri iri shyamba ahagana saa kumi n’igice z’umugoroba wo ku wa kabiri, yifashe ku itama n’umubabaro mwinshi w’inka ye yari hagati y’urupfu n’umupfumu kandi ntacyo yayimarira.

Ndagijimana yasobanuye ko “Impamvu ari ukubera inzara n’urugendo rurerure kuko yari imaze amasaha 4 igenda kandi ubusanzwe yari imfungwa (yororerwaga mu kiraro).”

Icyakora muri aya masaha, yari afite icyizere cy’uko ashobora kubona imodoka yahamusanga ikamutwarira iri tungo, ati “Natumije imodoka, ariko mfite ubwoba ko yapfa.”, gusa amaso yaheze mu kirere ijoro ririnda rigwa nta butabazi abonye.

Ahagana mu ma saa moya z’umugoroba, IGIHE yasanze uyu mugabo akiraririye inka ye, ariko yabimenyesheje abashinzwe irondo muri aka gace ngo bamurindire umutekano kuko iri shyamba riba riteye ubwoba nijoro.

Ubwo twari tukiganira n’uyu mugabo iyi nka yijigija ibyaye kabiri yashushe nk’ipfuye, ibyiringiro bya Ndagijimana wifuzaga ko yazanzamuka birashira, abwira IGIHE ko ababajwe bikomeye n’uko inzozi ze zo korora zitabaye impamo.

Mu gahinda kenshi yagize ati “Nyine ndahombye nsubiye ku isuka nta kundi. Ibi bihumbi 100 nari narabikoreye bingoye, mbikabika ngo ngure agaka none dore birarangiye.”

Kubw’urukundo uyu mugabo yumvaga akunze iri tungo rye, yavuze ko ryaba ryapfuye cyangwa ari rizima arirarira kugeza bukeye, ariko icyo yagaragaje kimushavuje kurusha ni ukuba nta byiringiro afite byo kuzabona andi mafaranga vuba ngo yishumbushe iri tungo ryamuhombeye.

[email protected]