Inyigo yakozwe n’abashakashatsi bo muri Kaminuza ya Anglia Ruskin de Cambridge mu Bwongereza, yagaragaje ko abageze mu zabukuru bagazanya, abasomana ndetse n’abakorana imibonano mpuzabitsina ku buryo buhoraho n’abo bashakanye bahorana akanyamuneza.

Yakorewe ku bantu 6879 bari mu kigero cy’imyaka 65. Urubuga rwa Glamourparis ruvuga ko Dr Lee Smith, umwarimu mu ishami ry’ubuvuzi muri kaminuza ya Anglia Ruskin, wungirije uwayoboye ubu bushakashatsi ashishikariza abakora mu ishami ry’ubuvuzi kujya bita cyane ku buzima bw’imibonano mpuzabitsina bw’abarwayi bageze mu zabukuru.

Ati “Inyigo yacu irakangurira abaganga kubaza abarwanyi ku buzima bwabo bw’imibonano mpuzabitsina kandi bagafasha abafite ibibazo byo kurangiza kuko imibonano mpuzabitsina mu by’ukuri ifasha abageze mu zabukuru kunezerwa”.

Ubundi bushakashatsi nk’ubu bwakozwe mu 2015, bwagaragaje ko mu Bwongereza abagore 54% n’abagabo 31% bafite imyaka iri hejuru ya 70 baba bagikora imibonano mpuzabitsina.

Ubwakozwe n’abashakashatsi bo muri Kaminuza zo mu Bwongereza za Coventry na Oxford basanze gukunda gukora imibonano mpuzabitsina ku bantu bakuze bituma imikorere yabo y’ubwonko ikomeza gukora neza nk’uko urubuga elcrema rubitangaza.

Basanze abageze mu zabukuru bakora imibonano mpuzabitsina mu buryo buhoraho bakomeza kubasha kuvuga neza badategwa ,bituma ndetse bakomeza kugira ubushobozi bwo kureba neza ibintu bibegereye n’ibiri kure yabo.