Bamwe mu bakoresha udukingirizo dukoreshwa n’abagabo batekereza ko uburyo ibiciro byatwo birutana, ari nako mu gikorwa cy’imibonano mpuzabitsina bigenda birutana. Ibigo n’amafarumasi acuruza udukingirizo akavuga ko icyo ari ikibazo cy’imyumvire kuko nta tandukaniro ririmo, umwimerere watwo ari wo utandukanye gusa.

Abagabo n’abagore bo mu duce dutandukanye tw’Umujyi wa Kigali batangarije IGIHE ko uburyo ibiciro by’udukingirizo birutana, bibatera impungenge no kwibaza itandukaniro. Hari n’abavuga ko mu mibonano mpuzabitsina wambaye agakingirizo uko iki gikorwa kigenda biba bitandukanye bitewe n’ubwoko bw’agakingirizo kakoreshejwe.

Nkuko bamwe mu baganiriye na IGIHE babitangaza ngo udukingirizo dufite uduheri dutandukanye n’udufite umubiri unyerera, yewe bitanakora kimwe, abandi bakavuga ko hari ubugira impumuro nziza ubundi ntibugire impumuro.

Minani Bosco acururiza mu isoko rya Nyabugogo mu Karere ka Nyarugenge agira ati “Udukingirizo dufite uduheri ku mugabo ni ibisazwe, ariko ku bagore ni akarusho mu gikorwa cy’imibonano mpuzabitsina nkurikije uko umukunzi wange adukunda, kurusha utudafite uduheri.”

Hari ubwoko bw’udukingirizo butandukanye burimo prudence na plaisir mu Rwanda, bugezwa hirya no hino mu gihugu n’ikigo Nyarwanda SFH.

Abacuruza udukingirizo bavuga ko udukingirizo twose ari kimwe, igitandukanye ari ubumenyi bw’ugiye kugakoresha n’uburyo uwo bagiye gukorana imibonano mpuzabitsina yateguwemo.

Nkundumugaba Martin ashinzwe ibikorwa by’ikigo gicuruza udukingirizo, imiti hamwe n’ibindi bikoresho by’ubuzima.

Yagize ati” Igihe cyose agakingirizo kakoreshejwe neza ntakabuza icyo gikorwa kigenda neza, igiciro cy’udukingirizo kiriho kinogeye buri wese mu kiciro arimo, uburyo bwo kurinda ni bumwe, udufite uduheri nutudafite uduheri twose ni kimwe.”

Nkundumukiza yakomeje avuga ko nta rindi banga ririmo, ahubwo dutandukanira gusa ku mwimerere watwo.