Iki kigo cyavumbuwe hafi ya Šurany, mu burengerazuba bwa Slovakia, mu gihe habanzaga gukorwa ubushakashatsi ku butaka bwari bugiye kubakwaho agace k’inganda.

Ubushakashatsi bwakorewe ku buso bugera kuri hegitari zirenga 149. Abahanga bavuga ko iki kigo gishobora kuba cyarakoreshejwe mu ntambara za Marcomannic Wars, zahuje Abaroma n’amoko y’Abadage ku mupaka wo mu majyaruguru w’Ingoma y’Abaroma.

Iki ni cyo kigo cya mbere cya gisirikare cy’Abaroma kivumbuwe mu gace ka Nitra muri Slovakia. Gifite imiterere idasanzwe ugereranyije n’ibindi bigo by’Abaroma, ariko kiracyafite ibimenyetso by’ibanze birimo amarembo atanu, inkuta z’ubwirinzi n’uburyo bwihariye bw’irembo buzwi nka clavicula.

Mu bindi byavumbuwe harimo amacumu, imyambi, ibice by’ingofero za gisirikare, ibice by’ingabo zo kwikingira, ibikoresho byo ku mikandara y’abasirikare, ibiceri n’inkweto za gisirikare zizwi nka caligae. Hanavumbuwe ishoka, icyuma n’utuntu twakoreshwaga mu mikino.

Abahanga bavuga ko iki kigo gishobora kuba cyaratawe nyuma y’intambara yahuje Abaroma n’amoko y’Abadage. Ubushakashatsi kuri uyu mwanya buzakomeza kandi bushobora kumara imyaka, kuko biteganyijwe ko buzafasha gusobanukirwa neza ibikorwa by’Ingoma y’Abaroma mu majyaruguru y’Uruzi Danube mu kinyejana cya kabiri.