Ibizamini byerekanye ko coronavirus isigara mu bihaha by’uwapfuye ayirwaye

Yanditswe na Twarabanye Venuste
Kuya 25 Werurwe 2020 saa 04:57
Yasuwe :
0 0

Ubushakashatsi inzobere mu gupima imirambo n’indwara zandura bakoreye ku mirambo 29 y’abazize COVID-19, bwerekanye ko iyo virusi nshya iguma mu bihaha by’abo yishe na nyuma yo gupfa.

Kuwa kabiri tariki 23 Werurwe 2020 inzobere z’Abashinwa mu gupima imirambo zatangaje ko coronavirus nshya iguma mu bihaha by’uwapfuye ayirwaye.

Ibiro ntaramakuru by’Abashinwa Xinhua, byatangaje ko ibizamini bakoze byerekanye gushegeshwa gukomeye k’ubudahangarwa bw’umubiri.

Inzobere mu buvuzi bw’indwara zitandura mu bitaro bya Kaminuza bya Peking, Wang Guiqiang, mu kiganiro n’itangazamakuru i Beijing yavuze ko ari gihamya ko impamvu abarwayi bapfa ari uko gushegeshwa k’ubudahangarwa bw’umubiri.

Wang yongeyeho ko iyo ndwara yohereza imyakura ituma udutsi two mu bihaha tuzamura umwuka tudakora neza ari byo bituma umurwayi agorwa no kuzamura umwuka mu buryo busanzwe agahumeka nabi.

Ibimenyetso bya coronavirus birimo guhumeka bigoranye bishobora kugera aho bitera umusonga na wo ushobora kubyara urupfu. Ibindi ni ibicurane, umunaniro n’inkorora ijyana no kubabara mu muhogo.

Ishobora kwandura binyuze mu kuramukanya abantu bahana ibiganza, hakabaho guhererekanya amatembabuzi yaturutse mu myanya y’ubuhumekero y’umuntu wanduye, maze uyakozeho akaza kwikora ku munwa, ku mazuru cyangwa mu maso, agahita yandura.

Umuntu ashobora no gukura iyi virusi ku kintu yaguyeho, kandi iyo gikomeye ishobora kumaraho amasaha menshi yagera no ku minsi itatu. Abantu basabwa kwitwararika, bakurikiza amabwiriza y’inzego z’ubuzima hibandwa cyane cyane ku gukaraba intoki, kwirinda kujya ahantu hateraniye abantu benshi n’ingendo zitari ngombwa.

U Bushinwa burakataje mu bushakashatsi kuri coronavirus yagaragaye bwa mbere muri icyo gihugu mu mpera za 2019 mu mujyi wa Wuhan. Urwego rushinzwe Ubuzima mu Bushinwa ruherutse gutangaza ko umuti uzwi ku izina rya Favipiravir usanzwe ukoreshwa mu kuvura ibicurane by’ubwoko butandukanye, ufite ubushobozi bwo gukiza icyorezo cya Coronavirus, nyuma yo kuwukoreraho ubushakashatsi guhera muri Gashyantare uyu mwaka.

Ubundi bushakashatsi bwakorewe mu bitaro bya Zhongnan bya Kaminuza ya Wuhan na bwo bwagaragaje ko ubushobozi bwo gukiza COVID-19 hifashishijwe Favipiravir ari bwo bwiza kurusha uburyo bwari busanzwe bukoreshwa.

Ubushakashatsi bwakorewe ku mirambo 29 y'abazize coronavirus bwerekanye ko iyo virusi iguma mu bihaha by'uyirwaye na nyuma yo gupfa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza