Einstein yari Umudage w’umuhanga mu bugenge wanabiherewe igihembo cyitiriwe Nobel.
Izo nyandiko yazandikiye umukozi w’iposita ubwo yari mu Buyapani mu 1922, hashize iminsi mike atsindiye icyo gihembo, yaje gutanga amasomo mu Mujyi wa Tokyo.
Uwo mukozi yamuzaniye ibaruwa mu cyumba cya hoteli yari acumbitsemo abura amafaranga y’agahimbazamusyi amuha, yaka ikaramu amwandikira inyandiko ebyiri ziriho inama z’ubuzima amubwira ko nagira amahirwe zizamwungukira.
Urwa mbere rwanditse mu Kidage rwari rwanditseho ngo “ Ubuzima butuje kandi bwo kwicisha bugufi buzana ibyishimo kurusha ubwo gukurikira intego wihaye n’umuruho ujyana nabyo.”
Urwa kabiri icyo gihe yanditseho ati “ahari ubushake hari inzira.” Rwo rwagurishijwe amadorali 240 000.
BBC ivuga ko izo nyandiko zaguzwe ku giciro kiri hejuru ugereranyije n’igenagaciro zari zakorewe. Umwe mu baziguze ni Umunyaburayi utifuje ko amazina ye atangazwa. Naho uwazigurishaga bivugwa ko ari umwishywa w’uwo mukozi w’iposita wazandikiwe.
Izindi mpanuro za Einstein:
– Ntitwakemura ibibazo mu mitekerereze nk’iyo twari dufite tubiteza
– Ikimenyetso nyacyo cy’ubwenge si ubumenyi ahubwo ni ibitekerezo
– Nta nubwo turamenya 1/1000 cy’ibyo kamere itwereka
– Iyo uri gutereta inkumi isaha ihinduka iba imeze nk’isegonda. Iyo wicaye ku ivu rishyushye isegonda rimwe riba rimeze nk’isaha.
Yavutse mu 1879, yigaragaza cyane nk’umuhanga mu bugenge kuva akiri muto. Ubwo Einstein yari muri Leta Zunze Ubumwe za Amerika mu 1933 yamenye ko Adolph Hitler yagiye ku butegetsi mu gihugu cye cy’u Budage. Ntiyabashije gusubirayo kuko yari umuyahudi, aguma muri Leta Zunze Ubumwe za Amerika nk’impunzi nyuma aza guhabwa ubwenegihugu.
Uyu mugabo yafashije icyo gihugu mu bushakashatsi ku bisasu bya kirimbuzi, yamagana ikoreshwa ryabyo mu Ntambara ya Kabiri y’Isi.
Yakomeje kwigisha muri kaminuza zitandukanye, apfa mu 1955. Einstein yanditse inyandiko z’ubushakashatsi kuri siyansi zibarirwa muri 300, zikifashishwa n’ubu mu ikoranabuhanga.
TANGA IGITEKEREZO