Nostradamus ushatse wamwita umupfumu cyangwa se umuhanuzi muri za mvugo z’abakozi b’Imana kuko byinshi mu byo yavuze bizaba ku Isi mu myaka isaga 700 ishize, byarabaye ibindi turacyabihanze amaso.

Yavuze ko John F. Kennedy wayoboye Amerika azapfa yishwe biraba, ahanura isenywa ry’inyubako za World Trade Center biraba n’ibindi.

Michel de Nostredame ‘Nostradamus’ yavukiye mu Bufaransa ku wa 14 Ukuboza 1503 mu Gace kitwa ‘Saint-Rémy-de-province’. Ababyeyi be ni Jaume de Nostredame na Reyniè de Saint-Rémy.

Yize ibijyanye n’Ubugenge “Physics”. Nostradamus yahanuraga agendeye ku bimenyetso by’ibiri mu isanzure birimo izuba, imibumbe ndetse n’inyenyeri maze akabasha kumenya ibizaba mu bihe bizaza.

Mu gitabo cye yise “Les Prophéties” gikubiyemo ibika bigera muri 942, kigaragaramo bimwe mu byo yagiye ahanura bigasohora, bigatuma afatwa nk’umwe mu bahanuzi babayeho kugeza na n’ubu.

Ubuhanuzi bwa Nostradamus bwasohoye

Bumwe mu buhanuzi uyu mugabo yagiye ahanura bwarasohoye, ubundi ntiburaza. Hari n’ibyo yagiye avugaho bitigeze bibaho.

Yavuze ku rupfu rwa Henry wa II mu Bufaransa

Henry wa II yari Umwami w’u Bufaransa, yabayeho mu myaka ya 1519-1559. Uyu mugabo na we yari azi neza ibyo Nostradamus yamuvuzeho ariko arabyirengagiza.

Muri ubu buhanuzi, Nostradamus yagiraga ati “Intare ntoya izigaranzura inkuru ku rugamba. Intare nto izasogota inkuru iyifungirane mu kazu, iyitere ibikomere bibiri muri kimwe. Azapfa urupfu rw’agashinyaguro.”

Icyabaye mu 1559 ni uko Gabriel Montgomery wari ushinzwe kurinda Umwami Henry II ari we wamwivuganye amuteye icumu mu jisho.

Icyo gikomere cyo mu jisho cyatumye umwami aremba cyane nyuma y’iminsi icumi aratanga.

Inkongi y’umuriro yibasiye Londres

Mu gitabo cya Nostradamus harimo igika kigaruka ku nkongi y’umuriro yagombaga kubera Londres.

Yagiraga ati "Nta maraso y’intungane azongera kuboneka Londres muri ‘66’, bose bazaba barahiriye mu muriro, umugore wa kera azahanurwa ku mwanya wo hejuru, abitandukanyije n’ubutegetsi bakishyira hamwe bazicwa.”

Icyabaye ni uko tarki ya 2 Nzeri 1666, umuriro watangiye ari muke mu nzu ikora imigati y’uwitwaga Thomas Farriner, yaje kuvamo inkongi iremereye y’iminsi itatu amaduka yose arashya, abantu i Londres barapfa.

Impinduramatwara mu Bufaransa

Mu gitabo "Les Propheties” hari aho Nostradamus yagarutse ku mpinduramatwara yagombaga kuba mu Bufaransa izwi nka ‘Révolution Française’.

Nostradamus yagize ati "Indirimbo zuzuye ibyifuzo by’abagizwe abacara, bagafungiranwa n’abakomeye zizaririmbwa. Abaswa bazabifata nk’ubuhanuzi gusa.”

Mu 1789 abaturage bo mu Bufaransa bafashe icyemezo bavuga ko barambiwe ubutegetsi bushingiye ku gatsiko k’abantu bamwe, barigaragambya bagera no muri Gereza ya ‘Bastille’ .

Byabaye ikimenyetso gikomeye muri iyo mpinduramatwara no kugwa kw’ingoma ya Cyami mu Bufaransa.

Urupfu rwa John F. Kennedy

John F. Kennedy yabaye Perezida wa 35 wa Leta Zunze ubumwe za Amerika, ava ku butegetsi arashwe.

Mu buhanuzi bwa Nostradamus yagize ati “Inshingano za kera zizasozwa, akaga kazagwira umugabo w’igihangange. Umugabo w’intungane azapfa ashinjwa icyo gikorwa. Urupfu rwe ruzaguma ari amayobera.”

Mu 1965, John F. Kennedy yarashwe isasu mu mutwe arapfa. Uwamwishe yapfuye atajyanywe mu nkiko ngo aburane. Kugeza na n’ubu 61% by’Abanyamerika ntibemera neza iby’uru rupfu.

Iki gitabo cya Nostradamus gikubiyemo ubundi buhanuzi bwinshi. Harimo nk’ibitero bya tariki 11 Nzeri 2001 byagabwe ku nzu y’ubucuruzi ya ‘World Trade Center’, Ibitero bya ‘Bombe Atomique’ bya Hiroshima na Nagasaki ndetse n’ibihe bya Adolphe Hitler.

Umwaka wa 2022 Nostradamus yawuvuzeho

Abahanga bagendeye ku byanditse muri iki gitabo “Les Propheties”, bavuga ko n’umwaka wa 2022 uyu muhanuzi yawuzeho.

Bimwe mu byo yawuvuzeho birimo kugwirwa ku Isi n’ibibuye biturutse mu isanzure, urupfu rutunguranye kuri bamwe mu bayobozi bakomeye mu Isi ndetse n’iyangirika ry’ikirere.

Nubwo hari ibyagiye biba bihuye n’ubuhanuzi bwa Nostradamus, hari abatabyemera bashingiye ku myemerere yabo ndetse n’abashingira ku byo yagiye avuga ntibisohore.

Nostradamus ni umwe mu bahanuzi bakomeye Isi yagize