Kaminuza ya Imperial College London yabitangaje, yavuze ko mu bagabo 120 bakoreweho ubushakashatsi nyuma y’ukwezi kumwe bakize Covid-19, 60% muri bo bari bafite intangagabo zacitse intege mu gihe abangana na 35% zagabanyije umuvuduko.

Mu bandi bagabo 51 bakoreweho ubushakashatsi nyuma y’iminsi 52 bakize Coronavirus, 37% ni bo basanganywe intanga zacitse intege abandi 29% basanganwa izifite umuvuduko muke, gusa mu masohoro yabo basanga nta Coronavirusi irimo.

Aba bashakashatsi baburiye abifuza gusama ko bishobora kudakunda mu gihe umugabo yaba amaze igihe gito akize Covid-19, bagaragaza ko byibura nyuma y’amezi atatu ari bwo intangangabo ziba zasubiranye imbaraga. Gusa bavuga ko hagikorwa ubundi bushakashatsi bwo kwemeza iki gihe ndetse buzanareba ko nta ngaruka z’igihe kirekire Covid-19 ishobora gusigira umugabo wayirwaye.

Ubu bushakashatsi bwagaragaje ko inkingo za Covid-19 zo zitagira ingaruka ku ntangangabo kuko zikoze mu ikoranabuhanga rya mRNA.

Ibyagaragaye muri raporo y’ubu bushakashatsi bije byiyongera ku bundi bwinshi bwakozwe bugaraza ko iki cyorezo kigira ingaruka ku bagabo cyane, kuko uretse no kuba intangangabo zitakaza ireme mu gihe barwaye cyangwa bakize Covid-19, baba bafite ibyago byo kuremba cyangwa kugaragaza ibimenyetso kurusha abagore.