Itsinda ry’inzobere mu bumenyi bw’ikirere , rigizwe n’Abanyamerika n’Abafaransa ryavumbuye undi mubumbe mushya ukubye Isi inshuro ebyiri, kandi ugizwe ahanini n’ubwoko bw’ibuye ry’agaciro rya diamant.

Uyu mubumbe wavumbuwe n’aba bashakashatsi b’inzobere mu bijyanye n’ubumenyi bw’ikirere , bakaba bawubatije izina rya 55 Cancri e.

Nk’uko ikinyamakuru Le Monde dukesha iyi nkuru cyabitangaje ku wa Gatanu tariki ya 12 Ukwakira 2012, umubumbe 55 Cancri e , uzenguruka imwe mu nyenyeri dushobora kubonesha amaso ibarizwa ku ntera ingana n’inshuro mirongo ine z’intera iri hagati y’isi n’Izuba.

Umurambararo w’uyu mubumbe wavumbuwe vuba aha, ukubye umurambararo w’Isi inshuro ebyiri. Ubushyuhe buba kuri 55 Cancri e bugera kuri 1 648 °C.

55 Cancri e uzenguruka iyo nyenyeri ku muvuduko uri hejuru kuko uwo mubumbe ukoresha amasaha 8 gusa, mu gihe isi yo ikoresha iminsi igera kuri 365 kugira ngo izenguruke Izuba.

Nk’uko umushakashatsi mu by’ikirere ukorera muri kaminuza ya Yale, Nikku Madhusudhan, yabitangaje, umubumbe 55 Cancri e ubonekaho amazi kandi igice kinini cyawo kigizwe na diamant gusa.
Ubu bushakashatsi bukaba bwaratangiye gukorwa umwaka ushize.