Abagabo n’abagore bo mu gihugu cy’u Bufaransa bugarijwe n’ingeso yo gucana inyuma, impamvu ikaba ngo ari ugushaka kwinezeza mu mibonano mpuzabitsina.

Amakuru atangazwa n’urubuga rwa Huffington Post aravuga ko gucana inyuma kw’abashakanye muri iki gihugu cyo ku mugabane w’u Burayi bimaze gufata intera ndende.

Iki gitangazamakuru kivuga ko Abafaransa batatu ku icumi baba barabeshye cyangwa baraciye inyuma abo bashakanye.

Ubushakashatsi bugaragaza ko abagabo 34% babeshye abagore babo, mu gihe abagore 24% na bo bavuze ko babeshya abagabo babo.

Impamvu zitera kubeshyana no gucana inyuma ahanini ngo ni ugushaka kwishimisha mu mibonano mpuzabitsina, abagabo bakaba ari bo batungwa agatoki kurusha abagore.

Abashakanye bari hagati y’imyaka 18 na 35 ubushakashatsi bwagaragaje ko baca inyuma abo bashakanye babikoreye ku bahoze ari abakunzi babo.