Abanyarwanda babarizwa mu gihugu cy’u Buhinde barimo abayobozi, abanyeshuri, abahatuye na bamwe mu Bahinde ku munsi w’ejo tariki ya 8 Mata 2012 bazahurira hamwe bunamire abazize Jenoside yakorewe Abatutsi.

Nk’uko IGIHE yabitangarijwe n’uhagarariye abanyeshuri b’Abanyarwanda wiga muri Kaminuza ya Brindavan ibarizwa mu Mujyi wa Bangalore, Umurenge wa Karnataka, Akagari ka Bhoopasandra witwa Kamikazi Joy, binyuze mu kiganiro twagiranye nawe yatangaje ko muri iki gikorwa umushyitsi mukuru azaba ari Ambasaderi Nkurunziza William uhagarariye u Rwanda mu gihugu cy’u Buhinde.

Uyu muhango ngaruka mwaka uzakorwa ku munsi w’ejo, uzabanzirizwa n’urugendo rwo kwibuka abazize Jenoside yakorewe Abatutsi y’1994 i saa yine za mu gitondo ’walk to remember’ bayobowe na Ambasaderi Nkurunziza, hazaba hari bamwe mu bayobozi b’Abahinde bazaba baje kwifatanya n’aba Banyarwanda, bamwe mu baturage b’Abahinde ndetse n’abandi banyamahanga ahanini biganjemo abigana n’aba Banyarwanda.

Nyuma y’uru rugendo, bazerekeza muri cyumba cy’inama cya Kaminuza ya Bangalore nyuma habe igikorwa cyo kugitangiza ku mugaragaro aho hazagarukwa ku mivugo, ubuhamya, indirimbo, amagambo n’ibindi bitandukanye ariko byose byerekeza ku gikorwa cyo gukomeza guhumurizanya.

Nk’uko Kamikazi yakomeje abitangariza IGIHE, yavuze ko ibi biganiro bizakorwa mu rurimi rw’icyongereza mu rwego rwo kwifatanyiriza hamwe n’abandi gukomeza kwibuka bakanamenyeramo amwe mu mateka yaranze igihugu cyacu.

Mu banyeshuri bakabakaba igihumbi babarizwa muri iyi Kaminuza ya Brindavan abanyarwanda 14 nibo bigamo aho abenshi mu bahiga batazi u Rwanda bakaba bararumenye ahanini biturutse kuri aba banyarwanda usanga biga mu Buhinde bakaba kandi bavuga ko Jenoside ari ibintu bibaho hose, gusa kugeza ubu bamwe muri bo bakivuga ko bashaka kuza muri Afurika ndetse no mu Rwanda.

Umujyi wa Bangalore ugizwe n’Abanyarwanda 275, bakaba bafite itorero rikora ibijyanye n’umuco Nyarwanda, mu birori by’abanyamahanga iri torero rikaba ribonekamo ribamurikira ibijyanye n’umuco w’u Rwanda.