Beijing - Ku itariki ya 7 Mata 2012 saa kumi z’umugoroba Abanyarwanda batuye mu Bushinwa, abanyeshuri bahiga hamwe n’inshuti z’u Rwanda bateraniye muri kuri ambasade mu muhango kwibuka ku nshuro ya 18 Jenoside yakorewe Abatutsi.

Umuhango wo kwibuka wabimburiwe n’indirimbo zitandukanye n’ijambo ry’Imana bikubiyemo ubutumwa bwo guhumuriza imitima y’abarokotse Jenoside, hatanzwe ubuhamya bw’Umunyarwanda warokotse Jenoside, ikiganiro cyatanzwe na Brig. Gen. Mubarak Muganga ndetse na Ambasaderi François Xavier Ngarambe uhagarariye u Rwanda mu Bushinwa gikubiyemo amateka y’uko u Rwanda rwari rumeze mbere y’abakoloni, imizi n’inkomoko ya Jenoside, kwerekana isura y’uko u Rwanda rwari rumeze mu gihe cya Jenoside naho rugeze ubu mu kwiyubaka.

Ambasaderi kandi yagize ati: “Abanyarwanda ndetse n’isi yose bagomba kwigira ku byabaye mu Rwanda maze bakubaka ejo hazaza heza kuko iyo utamenye amateka ntabwo ubona uko uha isura nziza ushaka kubaka.”

Nyuma y’ubuhamya n’ibiganiro habajijwe ibibazo bitandukanye harimo n’abanyamahanga bashakaga gusobanukirwa neza ku byabaye muri Jenoside yakorewe Abatusi. Abari bitabiriye umuhango wo kwibuka babonye ko kwigira ku mateka ya Jenoside yakorewe Abatutsi bifasha kurwanya ikibi ahantu hose kugira ngo ibyabaye mu Rwanda bitazongera kugira ahandi biba ku isi. Nyuma herekanywe filimi kuri Jenoside yitwa ”Ghosts of Rwanda”.

Ambasaderi François Xavier Ngarambe uhagarariye u Rwanda mu Bushinwa

Inkuru dukesha: Umunyamabanga wa Diaspora Nyarwanda i Beijing

Nzanywayingoma Frederic