Kamonyi - Kuwa kane tariki ya 19 Mata 2012, mu Murenge wa Kayenzi mu Karere ka Kamonyi bibutse abazize Jenoside yakorewe Abatutsi mu 1994.

Uyu muhango wabereye ku musozi wa Ntwari mu Kagari ka Cubi ukaba wari witabiriwe n’abantu bari baturutse hirya no hino mu gihugu, baba abavuka Kayenzi bakorera ahandi, inshuti z’Umurenge n’abakozi b’Akarere, mu rwego rwo gufata mu mugongo abaturage b’ uyu Murenge kuri iyi tariki bibukaho ku buryo bw’umwihariko.

Munyakazi Epimaque, Umunyamabanga Nshingwabikorwa w’Umurenge wa Kayenzi avuga ko uyu mwihariko w’Umurenge wabo usobanuye byinshi mu mateka yabo, kuko iyi tariki ibibutsa Abatutsi batabarika bishwe urw’agashinyaguro mu cyahoze ari Komini Kayenzi.

Uyu Muyobozi yasobanuye ko Jenoside yakorewe Abatutsi yatewe n’ubuyobozi bubi bwakwije amacakubiri mu bana b’u Rwanda kugeza ubwo umuntu yica umuturanyi we. Yasabye abari bitabiriye uyu muhango kwirinda amacakubiri, ahubwo bakihatira kunga ubumwe muri bo kandi bagahuriza ku bikorwa bigamije iterambere ryabo.

Mushimiyimana Gorette yari atuye ku musozi wa Ntwari ho mu Kagari ka Cubi igihe Jenoside yakorwaga .Mu muryango we w’abantu 8, niwe wenyine wabashije kurokoka. Mu buhamya bwe yasobanuye inzira y’umusaraba yaranze ubuzima bwe, asobanura kandi uburyo Abatutsi b’i Kayenzi bagiye bashinyagurirwa imihanda yose mbere yo kujugunwa muri Nyabarongo.

Uyu mubyeyi akaba asaba ubuyobozi gukomeza kuba hafi abacitse ku icumu kuko ariyo Mubyeyi basigaranye. Yasabye kandi abatuye umusozi wa Ntwari kuvugisha ukuri, bagatanga amakuru ku haba hakiri imibiri y’nzirakarengane itarashyingurwa kugira ngo nayo ihabwe icyubahiro gikwiye umuntu.

Ku ruhande rwa Ibuka, umuryango uharanira inyungu z’abacitse ku icumu rya Jenoside, Murenzi Pacifique ukuriye uyu muryango ku rwego rw’Akarere ka Kamonyi, we yibukije abacitse ku icumu kujya bashyira ahagaragara ibibazo bafite, kugira ngo bikorerwe ubuvugizi.
Yabasabye gukomeza kwihangana muri ibi bihe bitoroshye barimo, kandi abizeza ko Ibuka izakomeza kubafasha mu buvugizi, haba mu kubashakira amacumbi ndetse n’ubundi bufasha bw’ibanze bukenewe.

Uyu muhango wo kwibuka abazize Jenoside yakorewe Abatutsi mu 1994 mu Murenge wa Kayenzi, wabanjirijwe n’urugendo rwakozwe n’abaturage bari kumwe n’abayobozi babo berekeza kuri Nyabarongo, aho bashyize indabyo muri uwo mugezi mu rwego rwo kunamira imbaga y’Abatutsi bajugunywe muri aya mazi.

Inkuru dukesha: Faustin NTAKIRUTIMANA

Ushinzwe Itangazamakuru mu Karere ka Kamonyi