Kuva mu mwaka 1995 Abarokotse Jenoside yakorewe Abatutsi mu mwaka 1994 batangiye gushakisha hirya no hino imibiri y’ababo bakayishyingura mu cyubahiro ku ivuko.

Iyo waganiraga n’uwarokotse Jenoside igihe yabaga amaze gushyingura mu cyubahiro umuntu we yakubwiraga ko aruhutse. Mu ngo z’abacitse ku icumu usanga begeranye n’imva z’ababakomokaho kuri bamwe babashije kubabona.

Muri ibi bihe inzego zose zirengera abacitse ku icumu zifite gahunda yo kwegeranya imibiri y’Abatutsi yábazize Jenoside igashyingurwa mu nzibutso rusange.

IGIHE cyegereye bamwe mu barokotse Jenoside, maze batubwira uko bafata iki gikorwa cyo kwegeranya imibiri y’ababo bari barashyinguye ngo babajyane mu nzibutso rusange.

Uwizeyimana Samuel waganiriye na IGIHE umva uko yadusubije tumubajije uko afata iki gikorwa.

Yatangiye agira ati: “Njyewe Jenoside ikirangira nasabaga Imana ngo mbone aho bajugunye Data nagize amahirwe mubona aho bari baramutaye ku gasozi mu bushobozi bwanjye bukeya nakoze uko nshoboye ndamushyingura. Buri gihe na barumuna banjye isaha yose twibutse urukundo yadukundaga tujya mu gikari ahari imva ye tukicara tukamwibuka twarangiza tukamuragiza Imana none ngo nza mujyane mu rwibutso? Nta rwibutso ruruta imva ya Data.”

Nyuma yo kumva ubutumwa bw’abarokotse Jenoside hafi yabose batishimiye iki gikorwa, twabajije Umuyobozi wa Komisiyo y’igihugu ishinzwe kurwanya Jenoside, Jean de Dieu Mucyo niba koko iki gikorwa cyo kwegeranya imibiri y’Abatutsi bari barashyinguwe ikajyanwa mu nzibutso niba aribyo, akamaro kabyo n’uburyo buzakoreshwa kugira ngo abacitse ku icumu bumve neza akamaro k’iki gikorwa ndetse bazanagikore bishimye.

Mucyo agira ati: ”Iki gikorwa nibyo koko kirateganyijwe turashaka kwegeranya imibiri y’abazize Jenoside bose ndetse n’abashyinguye mu nzibutso nto kugira ngo basange abandi mu nzibutso nini.”

Yakomeje agira ati: “Kwegeranya imibiri y’Abatutsi bazize Jenoside bifite akamaro cyane kuko bizajya bifasha abantu kwifatanyiriza hamwe bakibuka ababo, bizafasha no kumenya amateka nyayo kuri Jenoside yakorewe Abatutsi.”

Umuyobozi wa CNLG yavuze ko kuba abarokotse batarumva akamaro kabyo ari uko batarisobanukirwa ati: “Tugiye gufata igihe twigishe abantu akamaro ko kwegeranya imibiri y’Abatutsi mu nzibutso nini kandi bazabyumva babikore neza”.

Mu Rwanda buri Karere gafite urwibutso, ariko hari aho usanga akarere kamwe gafite inzibutso ebyiri nka Nyamagabe, iki gihe bazajya bumvikana bahitemo urwibutso rumwe.