Kuri uyu wa gatandatu taliki ya 12 Gicurasi, abarokokeye ku rusengero rwa ADEPR Nyabisindu ho mu Murenge wa Nyamabuye bibutse ku nshuro ya 18, ababyeyi, abana, inshuti n’abavandimwe bahaguye bishwe muri Jenoside yakorewe Abatutsi muri Mata 1994.

Uwo muhango wabanjirijwe no gushyira indabo ku rwibutso rwa rwa Jenoside ruherereye ku Murenge wa Nyamabuye bunamira banashyira indabyo ku mva z’inzirakarengane bakomereza ku mva ziri ku rusengero rwa ADEPR Nyabisindu, ahari hateraniye imbaga y’abantu baje kwifatanya kwibuka dore ko iyi tariki iri muzasize inshike, impfubyi n’abapfakazi bari bahungiye kuri uru rusengero no mu kigo cy’amahugurwa kiri hafi y’uru rusengero.

Mu ijambo ry’ikaze ku ry’uhagarariye itorero yagarutse ku bunyamaswa buvugwa bwakorewe intama z’imana zari zahungiye ahera zikahamburirwa ubuzima. Ati: "Uyu munsi turavuga ko umurimo wa gitumwa wataye agaciro kuko bamwe mu bashumba b’itorero bijanditse mu mahano y’ubwicanyi mu gihe bari abashumba ba roho n’ubuzima bw’umuntu mu kuburinda mu nzira zose zishoboka".

Mu buhamya bwe, agaya yerekana uburyo abashumba b’itorero babatereranye ndetse bagafasha abicanyi yongeye kwikoma n’ubuyobozi bw’itorero buriho kuko nubwo bibutse batisanga mu mitegurire y’iki gikorwa nkaho nta nama n’imwe batumiwemo, ibi bagasanga bisa no kubambura agaciro.

Gasana yasabye ko n’ubuyobozi babafasha mu gikorwa gitaha mu kwegeranya abantu.

Mu ihumure no kwigisha buri wese ko yakumva kwibuka nk’igikorwa ndangagaciro gisubiza icyubahiro abishwe bazira uko bavutse, Perezida wa Ibuka mu Karere ka Muhanga, Rutsibuka Innnocent, yabwiye abatu ko bakwigiramo ubumuntu bakifatanya n’abandi kwibuka kuko kwibuka bidahariwe abarokotse, ko kwibuka bitareba gusa ababifite mu nshingano nk’abayobozi cyangwa uturiye ahibukirwa uyu munsi ahubwo bikwiye gukorwa bivuye ku mutima wa muntu.

Umuyobozi w’Akarere ka Muhanga, Yvonne Mutakwasuku, yibukije ko imyaka 18 igeze hibukwa Jenoside yakozwe n’abanyarwanda igakorerwa abanyarwanda bityo kwibuka ntago ari ukwigaragaza, asaba abantu kureka kumva ko ijisho ryo hirya yawe ryakujora ngo wibutse, ahubwo ukibukana ubutwari wiyubaka, udaheranwa n’agahinda kandi ukavugisha ukuri kubyo uzi.

Uru rwibutso rwa Nyabisindu rushyinguwemo imibiri isaga 540 bishwe bahungiye mu rusengero no mu kigo cy’amahugurwa cya ADEPER, harimo n’abapasitori biri torero ndetse n’abakristu baje baturutse imihanda yose mu bice bituriye uru rusengero.