Kuri uyu wa Kane mu gihugu cya Kenya habereye urugendo rwo kwibuka , ’Walk to Remember’, rwitabiriwe n’abarenga 400 barimo n’uhagarariye Loni muri Kenya wari n’umushyitsi mukuru muri uwo muhango.

Uru rugendo rutegurwa n’urubyiruko rw’u Rwanda rwishyize hamwe ngo ruharanire amahoro n’urukundo ku isi hose rwibumbiye mu itsinda “ PlP”, kuri iyi nshuro ya 18 hibukwa abazize Jenoside yakorewe Abatutsi mu Rwanda rwegereye n’abo mu bihugu by’amahanga kugirango babigishe ububi bw’amacakubiri bityo nabo babe imbarutso y’amahoro bakumira Jenoside.

Mu gihugu cya Kenya ’Walk to Remember’ yabanjirijwe n’amasengesho yo gusabira abazize Jenoside yakorewe Abatutsi ndetse hari hateguwe amabuji yacanywe murwego rwo kugaragaza urumuri rw’icyizere. Abayobozi bari aho bazanye n’indabo zishyirwa aho zari zateganyirijwe kujya, byose bikorwa mu rwego rwo kunamira abazize Jenoside yakorewe Abatutsi mu Rwanda.

Uwari umushyitsi mukuru muri uyu muhango, Madamu Zahle-work Zewde, umuyobozi wa Loni, icyicaro cya Kenya yagize ati:” Loni izakomeza gushyigikira ukuri ku byabaye muri Jenoside yakorewe abatutsi mu Rwanda”.

Uhagarariye igihugu cy’u Rwanda muri Kenya mu ijambo rye yibukije ko kwibuka Jenoside yakorewe Abatutsi ari umwanya mwiza wo kurushaho gufata ingamba zo gukumira ingengabitekerezo yayo; yashimangiye ko mu rwego rwo gukumira ingengabitekerezo ya Jenoside, Leta y’u Rwanda yimakaje ubumwe n’ubwiyunge mu Banyarwanda.

Madamu Kartanyi Yamina yakomeje ashimira ingabo z’u Rwanda zakomeje kuba imbarutso y’amahoro hirya no hino ku isi ndetse na Perezida Kagame wagaragaje ubutwari ku isi mu miyoborere.

Nyuma y’ibyo byose nibwo habayeho urugendo rwo kwibuka, aho abarwitabiriye bahagurutse ku cyicaro cy’Ambasade y’u Rwanda muri Kenya bakagera ku cyicaro cya Loni, bagasubira kuri Ambasade y’u Rwanda.