Ni ubushakashatsi bwakorewe ku barwayi 1200 bo mu bitaro umunani byo mu Bwongereza, bukorwa ubwo icyorezo cyari kihibasiye.

Ubu bushakashatsi bwaje kwerekana ko nta kimenyetso gifatika kigaragaza isano iri hagati y’ubwiyongere bw’impfu z’abarwayi ba Covid-19 n’imiti igabanya uburibwe nka Ibuprofen, Proxen na Diclofenac.

Ubwo bushakashatsi kandi ababukoze bavuga ko n’ubundi impfu z’abarwayi ba coronavirus zabonetse mu gihe uyu muti wari utaratangira gukoreshwa, ko zingana n’iziboneka nyuma y’aho utangiriye gukoreshwa.

Ubu bushakashatsi buje nyuma y’uko imiti ikoreshwa mu kuvura abarwayi ba Covid-19 irimo na Ibuprofen, yagiye ivugwaho kuba irembya abarwayi kurusha uko ibavura.

Muri Werurwe Minisitiri w’Ubuzima mu Bufaransa, Oliver Véran, yavuze ko “umuti wa ibuprofen n’uwa cortisone ishobora kuba ituma umurwayi wa coronavirus aremba.”.

Uyu muminisitiri yavuze ko byaba byiza umuntu akoresheje ibinini bya paracetamol igihe afite umuriro.

Ibi byaje gukurikirwa n’icyemezo cy’u Bwongereza kibuza abantu gukoresha ibuprofen igihe bagaragaje ibimenyetso bya coronavirus.

Nyuma y’ubu bushakashatsi bushya, leta y’u Bwongereza yisubiyeho, igira abantu inama yo gukoresha iyi miti igabanya uburibwe igihe bagaragaje ibimenyetso bya Covid-19, nk’uburyo bwo kwivura.

Ubushakashatsi bwemeje ko Ibuprofen nta ruhare igira mu guhitana abarwayi ba Covid-19 bayihawe