Abanyeshuri bakomoka mu bihugu bigize Umuryango wa Afurika y’Iburasirazuba biga mu Bushinwa, bamaze gutangiza Ihurira ribahuza ryiswe East African Students Association (EASA). Umuhango wo gutangiza iryo huriro ku mugaragaro wabereye ku cyicaro cya Amabasade ya Tanzania i Beijing mu Bushinwa.

Ku mugoroba wo ku itariki ya 17 Gicurasi 2013, ku cyicaro cya Ambasade ya Tanzaniya mu Bushinwa habereye umuhango wo gutangiza ihuriro ry’abanyeshuri biga mu Bushinwa bakomoka mu bihugu bigize Umuryango wa Afurika y’Uburasirazuba.

Uyu muhango witabiriwe n’abahagarariye ibihugu bigize Umuryango wa Afurika y’Uburasirazuba mu Bushinwa. Kenya yari ihagarariwe na Ambasaderi Kinyanjui Michael, u Burundi buhagarariwe na Ambasaderi Gasunzu Pascal, u Rwanda ruhagarariwe n’umujyanama wa Ambasade y’u Rwanda mu Bushinwa Rwanyagatare Virgile, Tanzaniya na Uganda ibyo bihugu byari bihagarariwe n’abajyanama bakuru muri za Ambasade zabo.

Uyu muhango witabiriwe kandi n’abanyeshuri n’abakozi barenga 150 baturutse mu mujyi wa Beijing no mu nkengero zawo, abayobozi bahagarariye imiryango ihuza abaturuka mu bihugu bigize Umuryango wa Afurika y’Uburasirazuba baba mu Bushinwa na bo bari bitabiriye uyu muhango.

Ganaafa Ibrahim uyoboye umuryango uhuza Abagande baba mu Bushinwa ni we watorewe kuba umuyobozi wa EASA kugeza mu mpera z’uwo mwaka. Kubera ko igihugu cya Uganda ari cyo kiyoboye Umuryango wa Afurika y’Uburasirazuba, Umujyanama mukuru muri Ambasade ya Uganda mu Bushinwa ni we watangije uwo muryango ku mugaragaro, avuga ko icyo gikorwa ari ingirakamaro haba ku rubyiruko ruri mu Bushinwa no ku muryango wa Afurika y’Iburasirazuba.

Intego y’uyu muryango uhuje abanyeshuri bakomoka mu bihugu bigize Umuryango wa Afurika y’Uburasirazuba biga mu Bushinwa ni ugutuma bamenyana, bagasangira ubunararibonye bafite ku Bushinwa, bagasangira ubumenyi n’ubuhanga bafite, bakubaka urunana ruzabafasha gufata iya mbere mu kumenyekanisha ibyiza bitatse akarere ka Afurika y’Iburasirazuba, kumenyekanisha no gusakaza umuco hakoreshejwe uburyo butandukanye.

Uyu muryango uzafasha cyane mu gukemura ibibazo abanyeshuri biga mu Bushinwa bakomoka muri ibi bihugu bahura na byo byiganjemo kutabona ibigo by’ubucuruzi n’ikoranabuhanga bibakira mu gihe bimenyereza umurimo, guhererekanya amakuru ajyanye no kubona amashuri no kubaka umwuga.

Ikindi ni uko ihuriro rizabafasha kuganira icyateza imbere akarere ka Afurika y’Uburasirazuba n’uruhare rw’urubyiruko mu guteza imbere imyidagaduro n’ibindi.
Uru rubyiruko rwasabye abahagarariye ibihugu byabo hano mu Bushinwa kubaba hafi, bakabagira inama muri uru rugendo rutoroshye batangiye.

Iyi nkuru tuyikesha Ir. Nshunguyimfura Victor, Rwanda Diaspora, Ishami ry’u Bushinwa