00:00:00 IGIHE NETWORK KN KINYARWANDA EN ENGLISH FR FRANCAIS

Urubyiruko rw’u Rwanda muri Kenya rwibukijwe amasomo ari mu rugendo rwo kwibohora

Yanditswe na Ntabareshya Jean de Dieu
Kuya 25 Nyakanga 2021 saa 07:04
Yasuwe :
0 0

Abanyarwanda baba muri Kenya baganiriye ku masomo bakwiriye kwigira mu rugendo rwaranze urubyiruko rwari urwa RPF Inkotanyi, rwemeye gusiga byose rugatangiza urugamba rwo kwibohora.

Urubyiruko rwasabwe kugendera ku muco waranze Abanyarwanda wo gukunda igihugu no kugira ubwitange, bagiteza imbere no kugifasha kwigobotora ibindi bibazo bicyugarije.

Ku wa 24 Nyakanga 2021 ni bwo Ambasade y’u Rwanda muri Kenya yateguye icyo kiganiro mu mujyo wo kwizihiza imyaka 27 u Rwanda rumaze rwigobotoye ubutegetsi bubi.

Ni umuhango witabiriwe n’Abanyarwanda bake baba muri Kenya, aho bahuriye ku cyicaro cya Ambasade mu gihe abandi basaga ijana bakurikiranye hifashishijwe ikoranabuhanga.

Ambasaderi w’u Rwanda muri Kenya, Dr Richard Masozera, yibukije abitabiriye icyo kiganiro ibyaranze urugendo rwo kwibohora, avuga ko bikwiriye kubera urubyiruko isomo rukamenya aho igihugu cyavuye.

Yavuze ko uburinganire n’ubwisanzure igihugu gifite atari ibintu byizanye, ko byaturutse ku muhate w’urubyiruko rwari urwa RPA, rwemeye guhara byose ngo Abanyarwanda bagire amahoro.

Umuyobozi wa Kaminuza y’u Rwanda, Ishami rya Huye, Dr Alphonse Mulefu, watanze ikiganiro yifashishije ikoranabuhanga, yavuze ku mateka ashaririye Abanyarwanda bari barahungiye mu mahanga babayemo ari nayo yatumye bigisha abana babo gukunda igihugu.

Ati “Abanyarwanda bahunze bahoraga babwira abana babo ko u Rwanda ari rwiza, ko rutemba amata n’ubuki ahubwo rwazize abakoloni. Ibyo bakabiganira, bakabiririmba ndetse abantu baranabitozwa ku buryo gukunda igihugu, Abanyarwanda n’umuco wabo byari ingenzi mu gushishikariza abandi kuko byatangaga icyizere ko bakongera bakabana neza.”

Yavuze ko kandi indangagaciro yo kwihangana no kugira ubwitange yaranze abari bagize RPA, byatumye bagera ku ntsinzi mu buryo butagoranye cyane.

Ati “Ingabo za EX-Far zari zifite ibikoresho bihambaye zifashwa n’amahanga akomeye ariko Inkotanyi zibarusha impamvu barwaniraga kuko bari bafite ubwitange burenga ubw’umuntu ku giti cye. Umwe iyo yapfaga abandi barakomezaga kandi bakabona ari inyungu zirenze umuryango bari barimo ubwabo nk’abari bahuje intego.”

Nyuma y’ikiganiro hakurikiyeho itangizwa ry’Ihuriro ry’abanyamwuga b’Abanyarwanda baba muri Kenya, Rwandan Professionals Network in Kenya (RPN-K), rigamije guhuza ubumenyi n’ubunararibonye bw’Abanyarwanda baba muri icyo gihugu, ngo basobanurirwe ibyo iterambere ry’igihugu rishyize imbere no guteza imbere ubumwe n’ubufatanye hagati y’Abanyarwanda baba muri icyo gihugu.

Iri huriro kandi rizifashishwa nk’ikiraro cyo guteza imbere umuco Nyarwanda, ubumwe, ubwiyunge no kurwanya amacakubiri.

Abatorewe kuyobora iri huriro bijeje umuhate wabo mu kugendera ku rugero rwiza ruranga ubuyobozi bw’u Rwanda, bateza imbere igihugu cyabo kandi barwanya ingengabitekerezo ya Jenoside.

Aloys Batsinduka na Yvonne Kabagire ni bo bayoboye ikiganiro ku #Kwibohora27
Dr Mulefu yavuze ko indangagaciro yo kwihangana no kugira ubwitange yaranze urubyiruko rwa RPA, yatumye rugera ku ntsinzi
Ambasaderi w'u Rwanda muri Kenya, Dr Richard Masozera, yavuze ko uburinganire n’ubwisanzure igihugu gifite ubu atari ibintu byizanye, ko byaturutse ku muhate w’urubyiruko rwari urwa RPA, rwemeye guhara byose ngo Abanyarwanda bagire amahoro
Ikiganiro ku #Kwibohora27 cyabaye hubahirizwa amabwiriza yo kwirinda Covid-19, aho Abanyarwanda bake aribo bari kuri ambasade, abandi bakurikiranye mu buryo bw'ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .