Tariki ya 4 Nyakanga buri mwaka ishimangira ubutwari bwaranze ingabo z’u Rwanda, umunsi ufatwa nko gucungurwa kw’igihugu cyari kivuye mu bihe by’amage.

Mu gihe mu hizihizwaga uyu munsi, Abanyarwanda baba mu Burusiya nabo bahuriye ku biro bya Ambasade y’u Rwanda muri iki gihugu babyina intsinzi banahiga kutazacogozwa n’ushaka ko basubira inyuma ahubwo bagaharanira gukora igiteza igihugu cyabo imbere, basigasira ibyagezweho, banarushaho guhanga udushya.

Mu biganiro byabahuje hagarutswe ku gusuzuma imihigo igihugu kimaze kwesa mu cyerekezo 2020, amahoro, umutekano, iterambere n’uburenganzira bwa muntu, bikaba biza ku isonga mu byishimiwe na buri wese.

Ambasaderi w’u Rwanda mu Burusiya, Mujawamariya Jeanne d’Arc, yashimiye abitabiriye ibirori byo Kwibohora k’u Rwanda ku nshuro ya 23 byanahujwe n’umunsi w’ubwigenge igihugu kimaze imyaka 55 kibonye.

Yagize ati “ Tariki ya 4 Nyakanga ni umunsi wo gushimira abana b’u Rwanda, abakobwa n’abahungu bafashe iya mbere bakiyemeza urugamba rwo guhagarika ikumirwa ryakorerwaga bamwe mu Banyarwanda mu gihugu cyababyaye bigatuma bahezwa, bakanavangurwa muri gahunda zitandukanye z’igihugu zagombye kugirira akamaro buri wese, kwikubira, ruswa n’akarengane byaje na Jenoside yakorewe Abatutsi mu 1994.”

Amb. Mujawamariya yashimiye ubutwari bwaranze urubyiruko rw’u Rwanda rwari rwibumbiye muri FPR Inkotanyi, rutatinye gutanga ikiguzi icyo aricyo cyose kugeza kucyo gupfira ku rugamba, ngo babohore u Rwanda baruvane mu maboko y’ingoma y’igitugu n’ubwicanyi.

Yasabye abakiri bato kubigiraho barushaho guhiga kugirira igihugu akamaro, kwigira no kwigenga byuzuye.

Amb. Mujawamariya yakomeje agaragaza ko u Rwanda rwabaye ishuri ry’imiyoborere myiza ndetse rukiri mu rugamba rwo kwiteza imbere kuko urw’amasasu rwarangiye.

Yagize ati “Aho igihugu kigeze ntituzasubira inyuma. Icyo ingabo zari iza RPA zaharaniye ko u Rwanda ruba rwiza, rukayoborwa neza, rudaheza abana barwo kandi buri wese yishimira kubamo”

Umudipolomate w’u Rwanda mu Burusiya, Col. Gashaija Emmanuel, yagarutse ku mateka y’urugamba rwo kwibohora n’uburyo rwari ngombwa.

Yagarutse ku buryo ingabo z’u Rwanda zikomeje urugamba rwo kubohora igihugu zirwanya ubukene, imibereho mibi, zibinyujije muri gahunda zitandukanye nka “Army week” yibanda ku bikorwa bitandukanye birimo kuvura abarwayi, kubara inzu, amashuri n’ ibiraro, gutanga amashanyarazi n’ibindi.

Imibare yabaruwe kugeza muri Kamena 2017 nyuma y’ukwezi kumwe ibi bikorwa bitangiye igaragaza ko mu rwego rw’ubuzima, abantu barenga ibihumbi 60 bahawe ubuvuzi bunyuranye. Ibishamikiye ku bikorwaremezo hubatswe hanasanwa ibiraro 219; ibirometero 135 by’imihanda y’igitaka (feeder road) byarasanwe ahandi irubakwa; inzu 2.359 zamaze kubakwa mu gihe izindi 43 zari zikiri kubakwa.

Ibyumba by’amashuri 18 byaruzuye mu gihe ibindi 13 biri kubakwa mu gihe ubwiherero 2.779 bwubatswe mu rwego rwo guteza imbere isuku n’isukura. Hakozwe kandi ibirometero 8 by’amazi mu Turere twa Nyagatare na Nyanza. Mu rwego rw’ubuhinzi, Ha 3.462 z’ibishanga n’imisozi byabyajwe umusaruro mu gihe kandi ingabo zafashije Minisiteri y’Ubuhinzi n’Ubworozi kurwanya nkongwa yibasiraga ibihingwa ku buso bungana na Ha 8000.

Ibirori byasojwe n’ubusabane n’igitaramo cyibanze ku muco gakondo, ababyitabiriye bahiga gushishikariza abakiri bato gusigasira indangagaciro Nyarwanda no kurinda ibyo igihugu cyagezeho.

Ambasaderi w’u Rwanda mu Burusiya, Mujawamariya Jeanne d’Arc, yagaragaje ko u Rwanda rudashobora gusubira inyuma

N'abanyamahanga bitabiriye ibi birori bagaragarizwa intambwe u Rwanda rwateye mu gihe gito ruvuye mu bihe bya Jenoside

Ibirori byaranzwe n'imbyino z'umuco Nyarwanda

Itorero ryakozwe n'urubyiruko ruba mu Burusiya niryo ryasusurukije abitabiriye ibirori byo kwibohora