Iki gikorwa cyaranzwe n’urugendo rwo kwibuka n’ibiganiro byarimo Abambasaderi b’ibihugu 45, Ambasaderi w’u Rwanda mu Buholandi, Jean Pierre Karabaranga ; Umunyamabanga mukuru muri Minisiteri y’ububanyi n’amahanga mu Buholandi, Yoka Brandt ; Umuyobozi w’Umujyi wa La Haye ; Abadepite mu Nteko Nshingamategeko ; Abanyarwanda bigayo cyangwa bahakorera, n’abandi.

Ambasaderi w’u Rwanda mu Buholandi, Jean Pierre Karabaranga, yashimiye abitabiriye kwibuka Jenoside yakorewe Abatutsi, nk’umwanya wo gufata mu mugongo abacitse ku icumu bose no kubahumuriza.

Yanagarutse ku mahanga yareberaga Jenoside iba, ayahamagarira gufatanya n’ubuyobozi buriho bwayihagaritse, burangajwe imbere Perezida Paul Kagame wari uyoboye Ingabo za FPR Inkotanyi mu rugamba rwo kwibohora.

Ati "Kwibuka nabyo tuboneraho gushimira no guha izo ntwari za FPR zaturokoye. Kwibuka na none ni umwanya wo kongera gufata ingamba zo guhangana n’abagifite ingengabitekereza ya jenoside no kubibutsa ko jenoside itazongera ukundi mu Rwanda."

Yashimiye u Buholandi bwabaye hafi u Rwanda mu bihe bikomeye, bukaba bunakomeje gutera inkunga ubutabera, bwohereza mu Rwanda abakurikiranweho uruhare muri Jenoside yakorewe Abatutsi, cyangwa bukababuranisha.

Yagize ati "Ibi bikaba ari urugero rwiza ku bindi bihugu bigicumbikiye abicanyi bakoze Jenoside yakorewe Abatutsi, ndasaba ko n’abandi bicanyi bari muri iki gihugu bakidegembya bafatwa bakaburanishwa mu Rwanda aho bakoreye jenoside."

Umunyamabanga mukuru muri Minisiteri y’ububanyi n’amahanga mu Buholandi, Yoka Brandt, wageze mu Rwanda Jenoside ikirangira muri 1994 , akanahagera muri 1996 no muri 2006, yavuze ko aruzi neza kandi rwashoboye kwivana mu icuraburindi rwari rwasigiwe na Jenoside.

Yizeza ko u Buholandi buzakomeza gufatanya n’u Rwanda.

Umuyobozi wa Ibuka mu Buholandi, Christian Mundele, yavuze ko abarokotse Jenoside yakorewe Abatutsi babana n’ibikomere byinshi bitandukanye ariko bakihangana kugira ngo ‘bagire imbaraga zo kwibeshaho no kwiyubakira igihugu, kitarangwamo amacakubiri’.

Ariko mu gusigasira amateka ya Jenoside, Mundele yasabye ko Meya w’umujyi wa La Haye yazagenera Ibuka ahantu ho gushyira urwibutso rwa Jenoside yakorewe Abatutsi nk’uko byagiye bikorwa hamwe mu bindi Bihugu by’u Burayi.

Bakoze urugendo rwo kwibuka Jenoside yakorewe Abatutsi

Ambasaderi w'u Rwanda mu Buholandi, Jean Pierre Karabaranga yifatanyije n'abandi mu rugendo rwo kwibuka

Polisi y'u Buholandi yacungiye umuteakano abari mu rugendo rwo kwibuka

Bakoze n'igikorwa cyo gucana urumuri rw'icyizere

Ambasaderi w'u Rwanda mu Buholandi, Jean Pierre Karabaranga, atanga ubutumwa bwo kwibuka ku nshuro ya 23 Jenoside yakorewe Abatutsi

Urubyiruko rwitabiriye igikorwa cyo kwibuka Jenoside

Safari Christine warokotse Jenosede yatanze ubuhamya

Umunyamabnaga mukuru muri Minisiteri y'ububanyi n'amahanga mu Buholandi, Yoka Brand