Uyu muhango wabaye ku wa Gatandatu tariki 12 Werurwe 2022, wateguwe ku bufatanye bwa Ambasade y’u Rwanda muri Congo n’Abanyarwanda bahatuye.

Ibi birori byabimburiwe na siporo rusange ku Banyarwanda batuye mu Mujyi wa Brazzaville, nyuma bakomereza ku cyicaro cya ambassade, mu birori nyirizina.

Ambassaderi Mutsindashyaka mu ijambo yagejeje ku bitabiriye ibi birori yagarutse ku ruhare rw’umugore mu iterambere ry’umuryango n’igihugu muri rusange.

Ati "kuva na kera mu muco nyarwanda, umugore yahoranye ijambo kuko umwami yayoboranaga n’Umugabekazi."

Ambassaderi Mutsindashyaka yanagarutse kandi ku kibazo cy’icyuho gishingiye ku busumbane hagati y’abagabo n’abagore ku Isi, agaragaza ko bizafata igihe kirekire kugira ngo kibashe kuzibwa.

Yakomeje avuga ko uko abakoloni baciye kirazira n’indangagaciro nyarwanda, ari nabo bagabanyije uburenganzira bw’umugore, ariko yishimira ko mu Rwanda, ubuyobozi bwiza burangajwe imbere na Perezida Paul Kagame bwimakaje uburenganzira bw’umugore, bikaba byaratumye bahabwa umwanya ufatika mu nzego zose za leta.

Yasabye Abanyarwanda batuye muri Repubulika ya Congo, kwimakaza umuco w’uburinganire n’ubwuzuzanye ndetse abasaba kwizihiza uyu munsi bazirikana insanganyamatsiko y’uyu mwaka ku rwego rw’igihugu igira iti "Uburinganire n’ubwuzuzanye mu guhangana n’imihindagurikire y’ikirere."

Muri uyu muhango kandi Abanyarwanda baba muri Repubulika ya Congo bagize umwanya wo kungurana ibitekerezo ndetse biyemeza gukomeza gushyigikira gahunda ya Cana Challenge ugamije gutanga umuriro ukomoka ku mirasire y’Izuba ku baturage batishoboye. Biyemeje gucanira ingo zirenga 300.