Ni igikorwa cyabaye ku wa 5 Nyakanga 2026. Nk’uko bisanzwe bikorwa buri mwaka, ibi birori byaranzwe no gusangira amafunguro, haba ibikorwa bitandukanye by’imyidagaduro byagenewe abana ndetse haba n’umwanya wo kuganira no gusabana hagati y’imiryango.

Uretse kuba byari ibirori byo kwishimira ibyagezweho, byabaye n’umwanya wo kurebera hamwe ibikorwa byaranze umwaka wa 2025/2026 kuri iri shuri ryashinzwe mu 2019 hagamijwe guteza imbere Ikinyarwanda n’umuco nyarwanda mu bana b’Abanyarwanda baba mu mahanga.

Umuyobozi wa Ishuri-Umuco, Eric Twagirimana, yashimye ababyeyi bagirira icyizere iri shuri, abarimu ndetse n’abakorerabushake bakomeje gutanga umusanzu mu kuriteza imbere.

Twagirimana washinze iri shuri yagize ati “Ndashimira mwese mwaje gushyigikira Ishuri-Umuco. Biradushimisha cyane kubona abantu benshi bitabira ibikorwa byacu kuko tudashobora kugira icyo tugeraho tudafatanyeije namwe ubwanyu.”

Yanagarutse ku rugendo abana, ababyeyi n’abarimu ba Ishuri-Umuco bagiriye mu Rwanda muri Gashyantare 2026, avuga ko ari kimwe mu bikorwa by’ingenzi byaranze uyu mwaka, anashimira cyane inzego za leta zabafashije uko bikwiye.

Ati “Uyu mwaka wabaye umwihariko. Muri Gashyantare twasuye u Rwanda mu rugendo rwabaye rwiza cyane. Nk’uko mubibona rwafashije abana kurushaho kwegerana no gukomeza kumva ko bafite aho bahuriye nk’Abanyarwanda.”

Twagirimana yavuze ko uru rugendo rwagaragaje neza umusaruro w’icyerekezo Ishuri-Umuco ryifuza kugeraho mu bihebizaza.

Yatanze urugero rw’umubyeyi wamubwiye ko atagikeneye guhatira umwana we kujya ku ishuri, ibintu yagaragaje nk’ikimenyetso cy’uko intego nyamukuru yaryo iri kugerwaho.

Ati “Intego ya mbere ya Ishuri Umuco ni ugutoza abana gukunda igihugu cyabo n’umuco wabo, gusigasira umuco n’indangagaciro nyarwanda.”

Twagirimana yavuze ko nubwo bishimiye aho bageze ariko bifuza ko abana bakongererwa igihe cyo kwiga, bakiga Ikinyarwanda ndetse bakabyina batozwa ibijyanye n’umuco mu buryo bwisumbuye.

Bamwe mu babyeyi bagaragaje ko bishimira intambwe abanyeshuri bateye muri uyu mwaka ndetse banashima uburyo Ishuri-Umuco rikomeje kunoza uburyo bwo kwigisha kugira ngo abana bakomeze kumenya inkomoko yabo, kuko bibafasha kubana neza n abo baturanye mu bihugu byakiriye imiryango yabo.

Mu mwaka w’amashuri utaha, Ishuri-Umuco riteganya gukomeza kwagura ibikorwa byaryo hagamijwe kurushaho guteza imbere impano z’abanyeshuri.

Twagirimana yatangaje ko hateganyijwe gutangiza “Igitaramo”, igikorwa ndangamuco kizajya kigaragaramo imbyino n’indirimbo gakondo, ndetse n’izindi mpano z’abanyeshuri.

Iki gikorwa kizabafasha gushyira mu bikorwa ibyo biga no gusangiza abandi bo mu bindi bihugu ibyiza bikubiye mu muco nyarwanda.

Perezida w’Umuryango w’Abanyarwanda baba mu Bubiligi (DRB), Ishami rya Liège, akaba n’Umuyobozi Wungirije wa Ishuri-Umuco, Kubwimana Josué, yavuze ko iri shuri ari n’urubuga rwo gutoza abana indangagaciro, amateka n’umuco nyarwanda.

Yasabye ababyeyi gukomeza gushyigikira iri shuri, agaragaza ko ubumwe, ubufatanye no gusigasira umurage w’umuco ari byo bizafasha umuryango nyarwanda wo muri Liège gukomeza gutera imbere.

Ibirori byasojwe n’ubusabane, aho ababyitabiriye basezeranye kuzongera guhura muri Nzeri 2027.

Donatille Karurenzi ni umwarimu n’umuhuzabikorwa mu Ishuri Umuco de Liège

Umuyobozi wa Ishuri-Umuco, Eric Twagirimana, yashimye ababyeyi bagirira icyizere iri shuri, abarimu ndetse n’abakorerabushake bakomeje gutanga umusanzu mu kuriteza imbere

Perezida w’Umuryango w’Abanyarwanda baba mu Bubiligi (DRB), Ishami rya Liège, akaba n’Umuyobozi wungirije wa Ishuri-Umuco, Kubwimana Josué, yavuze ko iri shuri ari n’urubuga rwo gutoza abana indangagaciro, amateka n’umuco nyarwanda

Espérance Naci Inamana, umubyeyi mu Ishuri-Umuco

Martine Munezero, umunyeshuri ku Ishuri-Umuco

Amafoto yaranze umunsi wo kwifurizanya ibiruhuko byiza n’ababyeyi

[email protected]