Tariki ya 7 Mata buri mwaka, Abanyarwanda bari imbere mu gihugu ndetse n’abari mu mahanga bibuka inzirakarengane zisaga miliyoni zaguye muri Jenoside yakorewe Abatutsi mu Rwanda mu mwaka w’1994. Abanyeshuri b’Abanyarwanda biga mu Misiri nabo kuri iyi nshuro barifatanya n’abandi kwibuka.

Mu kiganiro twagiranye na Hagabimana Eugene wiga muri mu cyiciro cya gatatu cya Kaminuza ya Senghor, yadutangarije ko kuri uyu munsi, kimwe n’abandi Banyarwanda bari hirya no hino bari buhure mu rwego rwo kwibuka abazize Jenoside yakorewe Abatutsi mu Rwanda.

Nk’uko bigaragara mu butumwa aba banyeshuri b’Abanyarwanda bagejeje ku bayobozi ndetse bagenzi babo bigana muri iyi Kaminuza babasabye gukora iyo bwabaga kugirango Jenoside ntizagire aho iba ukundi.

Bagira bati : " Twese hamwe nk’Abanyafurika biga muri Kaminuza ya Senghor, twebwe bayobozi b’ejo, duharanire kurwanya ingengabitekerezo y’amacakubiri ; twese hamwe duharanire ubumwe, bityo Afurika yunge ubumwe kandi irusheho gutera imbere".

N’ubwo mu Misiri nta Ambasade y’u Rwanda ihari ngo ifashe abahatuye guhura, ndetse abenshi mu bahatuye bakaba ari abanyeshuli baba mu murwa mukuru i Cairo n’i Alexandria, ngo bagomba guhura kugirango bifatanye n’Abanyarwanda bose kwibuka Jenoside yakorewe Abatutsi.

Yagize ati: “Nimugoroba turahura nk’umuryango nyarwanda turebe filime kuri Jenoside, tunungurane ibitekerezo ku nsanganyamatsiko y’uyu mwaka. Ejo dufite Misa yo gusabira inzirakarengane, kuwa kane bwo tuzaganiriza abanyeshuli bandi ku byatubayeho tunerekane filime kuri Jenoside yakorewe Abatutsi mu Rwanda. Abahura ni abanyeshuli 5 biga muri Master’s muri Kaminuza ya Senghor na barumuna babo 9 biga muri Kaminuza ya Alexandrie”.

Hagabimana akomeza avuga ko ubwo basabaga ubuyobozi bw’abanyeshuri muri iyi Kaminuza kwibuka abazize Jenoside yakorewe Abatutsi babyakiriye neza kuko ngo nabo basobanukiwe neza ibyabaye mu Rwanda.

Ati: “Babyakiriye neza kuko amahano yagwiriye u Rwanda isi yose irayazi, gusa benshi mu banyeshuli ntibafite amakuru ahagije kuri Jenoside, abandi ibyo bazi ntaho bihuriye n’ukuri, abanyeshuli benshi hano baturuka mu bihugu by’Afurika y’Uburengerazuba ku buryo hari abafite isura y’u Rwanda bahawe n’abahahungiye nyuma ya 1994 idafite aho ihuriye n’ukuri kwa Jenoside yakorewe Abatutsi mu Rwanda mu mwaka w’1994. Gusa dukora ibishoboka byose tukerekana isura nyayo y’igihugu ku buryo abenshi baba bifuza gusura u Rwanda nk’igihugu cyahuye n’akaga ariko kikiyubaka byihuse nyuma ya Jenoside”.

Uretse aha mu Misiri bari mu bikorwa byo kwibuka ku nshuro ya 18, twababwira ko hirya no hiro haba muri Leta Zunze Ubumwe z’Amerika, Canada, u Bubiligi n’ahandi naho bakomeje ibikorwa byo kwibuka kimwe no mu Rwanda imbere mu gihugu.