Canada: Umuryango Humura urashima ubwitabire mu bikorwa byo kwibuka

00:00:00 IGIHE NETWORK

KINYARWANDA

ENGLISH

FRANCAIS

Canada: Umuryango Humura urashima ubwitabire mu bikorwa byo kwibuka

Yanditswe na IGIHE

Kuya 5 May 2017 saa 08:30

Yasuwe :

Yavuzweho:

Mu gihe mu Rwanda ni ku ISi yose muri rusange hibukwa ku nshuro ya 23 Jenoside yakorewe Abatutsi, kuva tariki 7 Mata kugera tariki 29 Mata Abanyarwanda baba muri Canada n’inshuti zabo bitabiriye ibikorwa byo kwibuka ku buryo bushimishije nk’uko bitangazwa n’ubuyobozi bw’Umuryango Humura.

Humura ni umuryango udaharanira inyungu ufite icyicaro muri Canada.
Umuyobozi uwuhagarariye, Jean Claude Ngabonziza, yagarutse ku ruhare runini wagize mu bikorwa byo kwibuka mu mijyi ya Ottawa (uri mu ntara ya Ontario) na Gatineau (uri mu ntara ya Québec).

Ati “Ku itariki ya 7 Mata, saa sita z’amanywa ni ho habaye itangizwa ku mugaragaro ry’ibikorwa byo kwibuka ku nshuro ya 23. Uwo muhango wabereye imbere y’ingoro y’inteko ishinga amategeko ya Canada. Ku mugoroba w’uwo munsi muri Paruwasi yitwa Louis-de-Monfort iri Ottawa habaye ikiriyo cyo kunamira abazize Jenoside”.

Tariki ya 16 Mata kuri Paruwasi Notre-Dame de l’Île iri mu mujyi wa Gatineau habereye igitambo cya misa kidasanzwe cyo gusabira abazize Jenoside yakorewe Abatutsi. Uwo muhango wafatanyijwe no kwizihiza Pasika, aho umupadiri witwa Jean SansCartier yabwiye abari aho ko ububabare bwagizwe n’abazize Jenoside buremereye ku buryo bwabobezwa n’ingabire za Yezu wazutse.

Isozwa ryo kwibuka ku nshuro ya 23 ryabaye tariki ya 29 Mata mu mujyi wa Gatineau, ribimburirwa no gushyira indabo mu mazi hibukwa abajugunywe mu nzuzi no mu biyaga ndetse n’abo imirambo yabo yazimiye. Nyuma imihango yakomereje mu cyumba cyitwa Agora kiberamo imihango y’icyubahiro muri uwo mujyi.

Mu bagize uruhare muri iyo mihango harimo umuhanzi, umwarimu akaba n’umwanditsi Jean-Marie Vianney Rurangwa wagaragaje uko Jenoside yakorewe Abatutsi yavuye ku ngengabiterezo igashyirwa mu bikorwa.

Umuvugo Rurangwa yahimbye witwa “Essuie tes larmes et tiens-toi debout!” wavuzwe n’uwitwa Mahoro Geny n’imwe mu ndirimbo ze iririmbwa n’abanditsi b’Abayahudi Philippe Grimberg na Krystèle Kennedy, aho banyuzagamo bakavuga mu Kinyarwanda bati “Biragatsindwa ibyabaye, dusabe Imana ntibizasubire!”

Mu bikorwa byo kwibuka, Umuryango Humura ushimishwa n’ubufatanye ugirana n’abagize umuryango IBUKA muri Canada, ndetse na Ambasade y’u Rwanda muri icyo gihugu. Ushima kandi uburyo Abanyarwanda, cyane cyane urubyiruko, bakomeje kwitabira ibikorwa byo kwibuka.

Ngabonziza yemeza ko umuryango Humura uzakomeza gufasha abacitse ku icumu mu Rwanda nk’uko usanzwe ubikora, aho bigeze gukusanya inkunga yo gufasha umuryango Duhozanye n’ishuri ry’imfubyi ry’i Rutongo.