Mali: Hashimwe uruhare rw’ingabo za FPR mu ihagarikwa rya Jenoside

00:00:00 IGIHE NETWORK

KINYARWANDA

ENGLISH

FRANCAIS

Mali: Hashimwe uruhare rw’ingabo za FPR mu ihagarikwa rya Jenoside

Yanditswe na Israel Ishimwe

Kuya 20 July 2016 saa 02:16

Yasuwe :

Yavuzweho:

Minisitiri w’Ububanyi n’Amahanga n’Ubutwererane bwa Afurika muri Mali, Abdoulaye Diop mu butumwa yatanze mu birori byo kwizihiza umunsi wo Kwibohora yashimye ubutwari bwa Perezida Paul Kagame ndetse n’ingabo yari ayoboye zitanze zigahagarika Jenoside yakorewe Abatutsi muri Mata 1994.

Minisitiri Abdoulaye Diop yabitangarije mu birori byo kwizihiza umunsi wo kwibohora k’u Rwanda ku nshuro ya 22 byabereye mu nzu y’Inama Mpuzamahanga y’i Bamako, Centre International de Conferences de Bamako (CICB).

Minisitiri Diop wari uhagarariye Perezida wa Mali muri uwo muhango, yatangaje ko u Rwanda ruyobowe n’ubuyobozi bwiza burangajwe imbere na Perezida Paul Kagame uhora ashaka iterambere rusange ry’Abanyarwanda no kubatoza indangagaciro zo kwigira no kwiyubakira ejo heza.

Kuwa 9 Nyakanga 2016, nibwo Abanyarwanda baba mu gihugu cya Mali bizihije umunsi mukuru wo Kwibohora. Wahuriyemo abasaga 240 barimo Abanyarwanda baba muri iki gihugu, abaminisitiri batandukanye, abayobozi bo mu nzego zitandukanye za Leta ya Mali, abahagarariye ibihugu byabo n’Imiryango mpuzamahanga n’itegamiye kuri Leta muri Mali ndetse n’inshuti z’u Rwanda zikomoka muri Mali, Repubulika Iharanira Demokarasi ya Kongo, Uganda,u Burundi n’ahandi.

Benshi mu bitabiriye ibi birori bishimiye iterambere ridasanzwe u Rwanda rumaze kugeraho ndetse bagaragaza ko Afurika hari byinshi ikwiye kurwigiraho mu rugamba rwo Kwibohora no kwiyubaka.

Yvette Nyombayire Rugasaguhunga wari uhagarariye Ambasade y’u Rwanda ifite icyicaro i Dakar muri Senegal yashimiye Ubuyobozi n’Abaturage ba Mali bemeye kuza kwifatanya n’Abanyarwanda muri ibi birori ndetse n’uburyo badahwema gushyigikira abanyarwanda.

Yagarutse ku mateka y’urugamba rwo kwibohora, asaba abari aho kunamira intwari Fred Gisa Rwigema n’izindi Ntwari zitanze zigahagarika Jenoside yakorewe Abatutsi ndetse zibohora u Rwanda.

Rugasaguhunga yerekanye ko urugamba rwo kwibohora rugikomeza, ahamagarira Abanyarwanda n’inshuti zabo gukomeza gusigasira agaciro n’ubumwe, ari byo musingi w’iterambere rirambye.

Emmanuel Bigenimana uhagarariye Abanyarwanda baba muri Mali yashimiye Perezida wa Mali kuba yaboherereje uza kwifatanya nabo mu muhango wo Kwibohora, anashimira abitabiriye bose.

Ibirori byo kwizihiza umunsi wo Kwibohora byasojwe n’igitaramo cy’indirimbo, imivugo ndetse n’imbyino gakondo.