Ni imigabane ifite agaciro ka miliyari 1,8$ yari yaraguzwe n’ikigo cya Pinault gikora ibicuruzwa bihenze nka Gucci, Saint Laurent, Balenciaga n’ibindi.

Anta yavuze ko izakoresha ubunararibonye bwayo mu gufasha Puma kongera kugurisha no gukundwa cyane ku isoko ry’u Bushinwa no ku rwego mpuzamahanga.

Umuyobozi mukuru wa Anta, Wei Lin, yagize ati “Puma ifite amahirwe menshi ku isoko ry’u Bushinwa, aho ringana na 7% gusa by’inyungu zayo ku Isi. Dufite ubunararibonye bwinshi bwo gufasha Puma kongera gufata isoko ryo mu Bushinwa.”

Ni mu gihe Puma iri mu rugendo rwo kongera imbaraga mu rwego rwo guhangana ku isoko nyuma yo gusigara inyuma y’ikigo cya Nike, Adidas n’ibirango bishya nka On Running.

Umuyobozi wa Puma, Arthur Hoeld, yavuze ko iki gikorwa ari ikimenyetso cy’icyizere mu cyerekezo cya Puma.

Ati “Anta igamije gufasha Puma kugera ku bushobozi bw’ikirango cyayo no ku murage wacyo kugira ngo yiheshe agaciro k’igihe kirekire ku bakiliya n’abafatanyabikorwa bayo ku Isi hose. Ni ikimenyetso cy’icyizere mu cyerekezo cya Puma.”

Uruganda rwa Puma rwashinzwe mu Budage mu 1948 na Rudolf Dassler, rukaba rwarubatse izina mu gukora inkweto za siporo, imyenda n’ibikoresho bijyana na yo.

Anta Sports Products yo ni ikigo cyo mu Bushinwa cyashinzwe mu 1991. Gikomeye mu gukora imyambaro ya siporo gifite ibirango nka Fila, Salomon na Arc’teryx.

Ibi bigo byombi bihuriye ku gukora imyambaro n’inkweto bya siporo