Ni ibirori bikomeye byabaye mu ijoro ryo kuri uyu wa Gatatu tariki ya 30 Ugushyingo 2016 ahitwa Grand Palais mu Mujyi wa Paris mu Bufaransa.

Victoria’s Secret Show’ yitabiriwe n’abanyamideli 51 bakomeye ku Isi barimo Alessandra Ambrosio, Adriana Lima, Taylor Hill, Jasmine Tookes, Kendall Jenner, abavandimwe Gigi na Bella Hadid, Lily Aldridge n’abandi banyuranye.

Ku nshuro ya mbere kabiri, abanyamideli basanzwe ari inshuti Kendall Jenner na Gigi Hadid berekanye imideli muri ibi birori byahuruje imbaga mu Mujyi wa Paris.

Abahanzi batandukanye barimo Lady Gaga, The Weeknd na Bruno Mars basusurukije ibi birori. Icyatunguranye ndetse kigashimisha benshi ni uburyo umunyamideli Bella Hadid yiyerekanye muri ibi birori ahura n’umuhanzi bahoze bakundana The Weeknd byongera ibyishimo mu bakurikiranye ibirori.

Ibirori birangiye, muri Grand Palais hakwirakwijwe inkuru ihamya ko umunyamideli Irina Shayk wahoze akundana na Cristiano Ronaldo atwite inda ya Bradley Cooper gusa ababivuze nta gihamya batanze na nyir’ubwite kugeza ubu ntacyo yabivuzeho.

Abitabiriye ibi birori baganiriye na ABC News bahamije ko ari byo bya mbere biruta ibindi byose byerekeranye n’imideli byabereye muri Grand Palais. Abategura iri murika ry’imideli rigamije no kwamamaza ibikorwa na Victoria’s Secret bamaze kugera ku rwego rwo hejuru mu kwinjira amafaranga mu mideli, mu mwaka wa 2014/2015 ubukungu bwabo bwarazamutse bugera kuri miliyari 7.2 z’amadolari.