Mizero Cedric azahagararira u Rwanda muri London Fashion Week

Yanditswe na Muvunyi Arsène
Kuya 20 Mutarama 2019 saa 09:04
Yasuwe :
0 0

Umuhanzi w’imideli Cedric Mizero azaserukira u Rwanda mu birori mpuzamahanga byo kumurika imideli bya London Fashion Week.

Mizero ni umwe mu bahanzi b’imideli bamaze kugira ibigwi mu Rwanda. Ari mu itsinda ry’abahanzi b’imideli bakomeye ryitwa Collective Rwanda banategura imiruka ry’imideli biyitiriye (Collective Rwanda Fashion Week.)

Collective Rwanda ihuriwemo n’inzu z’imideli nka Moshions, House Of Tayo, Haute Baso, Inzuki Designs, Uzi Collections, Sonia Mugabo na Amizero ya Cedric Mizero.

Urubuga rwa British Council rwatangaje ko Mizero ari we uzahagararira u Rwanda mu imurika mpuzamahanga ry’imideli (International Fashion Show) mu cyumweru cy’imideli cyibera mu Bwongereza (London Fashion Week 2019).

London Fashion Week izaba kuva ku wa 11 kugera ku wa 25 Gashyantare 2019.

Mizero azaba ari kumwe n’abandi banyamideli 15 baturutse mu bihugu bitandukanye byo ku Isi, batoranyijwe mu basaga 300 bari babisabye, bakazerekana imideli itandukanye bahanze.

Mu kiganiro yagiranye na IGIHE, yatangaje ko yishimiye gutoranywa muri aba banyamdeli bazerekana imideli bahanze.

Avuga ko umwihariko we atari ukwerekana imideli acuruza, ahubwo we icyo abagamije ari ugutanga ubutumwa bushobora kuzana impinduka muri sosiyete.

Ati “Fashion kuri njye ni igikoresho kimfasha kubara inkuru. Nararebye nsanga imideli ni ikintu abantu baba bashaka kureba, ni ikintu gikurura abantu. Njye nkore ibintu kugira ngo mvuge amateka. Intego yanjye ni ukugira ngo ngire impinduka muri sosiyete.”

Muri London Fashion Week, Mizero azerekana imideli yise Dreaming My Memory, aho azaba agaragaza ubuzima bwe kuva mu bwana agifite imyaka 10.

Ati “Nzaba nshaka ko abantu binjira mu byo nibuka ngifite imyaka 10, uko nakuze ariko muri ibyo nibuka bizaba bimeze nk’inzozi, ndi kubirota. Nzaba mvugamo inkuru nyinshi zitandukanye.”

Uyu musore wakuriye mu Ntara y’Uburengerazuba, amaze iminsi yerekana imideli itarobanura ibyiciro by’abantu mu mushinga we yise “Fashion for All”.

Muri uyu mushinga yifashisha abagore bo mu Karere ka Rusizi aho avuka, akagaragaza agaciro n’uburenganzira bwa buri muntu kandi bakishimira imyambarire yabo hatitawe ku myaka, ingano, ubukire cyangwa ubukene.

Mu 2017 yamuritse umushinga yise Strong Women, ugaragaza imbaraga z’abagore n’inshingano zabo, cyane abo mu cyaro aho yifashishije amafoto, agaragaza ubuzima bwabo ariko bambaye imideli yakoze.

Hari n’indi mideli yise Beauty In The Heart igaragaza ko ubwiza bw’umuntu budakwiye kureberwa ku isura ye.

Muri Gashyante azasoza amasomo y’amezi umunani yigiye kuri internet mu ishuri rya London Fashion College mu bijyanye n’ubucuruzi mu mideli (Fashion Business).

Strength Of Women, imideli igaragaza imbaraga z'umugore yahanzwe na Mizero
imideli ya Mizero ubwo yamurikwaga muri Collective Rwanda Fashion Week mu 2018
Mizero atanga ubutumwa butandukanye yifashishije abantu b'ingeri zose
Mizero Cedric yatoranyijwe kuzahagararira u Rwanda muri London Fashion Week

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza